Россия Америка ва Европа мамлакатлари санкциялари туфайли узоқ муддатли ва чуқур иқтисодий рецессияга дуч келиши мумкин, мамлакат иқтисодиёти йиллар давомида таяниб келган соҳалар хавф остида қолиши мумкин. Bloomberg агентлиги РФ ҳукуматининг ички ҳисоботига таяниб ушбу маълумотни эълон қилди, деб ёзмоқда kommersant.ru.

Тақдим этилган учта ҳисоботнинг иккитасида келтирилишича, келаси йили Россияда иқтисодий пасайиш тезлашади. Мамлакат иқтисодиёти Украинада махсус амалиёт бошлангунга қадар даражага қайтиш учун яна ўн йил ёки ундан ҳам кўпроқ вақт керак бўлади.

«Инерцияли» сценарий шуни кўрсатмоқдаки, келаси йили иқтисодиётдаги тушкунлик 8,3 фоизгача етади, бу 2021 йилдагидан ҳам пастдир. «Стрессли» сценарий бўйича, 2024 йилда тушкунлик 2023 йил билан таққослаганда 11,9 фоизни ташкил этади. Барча сценарийлар санкциялар босимининг кучайишини назарда тутмоқда. Қолаверса, эҳтимол, борган сари кўпроқ мамлакатлар санкцияларга қўшилади, деб ёзмоқда Bloomberg. Ҳукумат маърузасида келтирилишича, Европанинг Россия нефти ва газидан бирданига воз кечиши Кремлнинг ўз бозорини таъминлаш қобилиятига зарба бўлиши мумкин.

РФ экспорти ва импортининг тахминан чорак қисмини қамраб олган чекловлардан ташқари, маърузада техникавий «қамал» ҳақида ҳам гап борган. Ушбу қамал транспортнинг қарийб барча турига салбий таъсирини кўрсатган. Бунда гап Россияда автомобиллар ишлаб чиқариш учун эҳтиёт қисмлар ва ускуналар етказиб берилишидаги чекловлар ҳақида ҳам бормоқда.

Ҳисоботда шунингдек, мутахассислар етишмаслиги ҳам иқтисодиётга салбий таъсир кўрсатиши мумкинлиги айтилади. Ҳужжат муаллифларининг баҳолашича, 2025 йилга келиб мамлакатни 200 минг нафаргача IT-мутахассислар тарк этиши эҳтимоли бор.

Иқтисодий инқироз ҳолати нафақат Россияда, балки унга қарши санкция қўллаётган мамлакатларда ҳам кузатилади. Масалан, Бундесбанкнинг огоҳлантиришича, кузда Германияда инфляция “икки хонали рақамга” етиши мумкин. Британияда эса инфляция 40 йил давомида илк бор 10 фоиздан ошди.

Bloomberg олиб борган сўровда иштирок этган экспертларнинг таъкидлашича, Евроҳудудда рецессия таҳдиди 2020 йилдан буён энг юқори даражага чиққан.