Венгрия Бош вазири Виктор Орбан Вашингтондаги НАТО саммитидан кейин АҚШ собиқ Президенти Дональд Трамп билан Флоридадаги Мар-а-Лаго қароргоҳида учрашади. Бу ҳақда “Bloomberg” манбаларга таяниб хабар берди.

Ўтган ҳафта Орбан Украинадаги вазиятни ҳал қилиш йўлларини топиш учун бир неча мамлакатга ташриф буюрди. Хусусан, 5 июль куни Россия Президенти Владимир Путин билан Москвада тинчлик музокарасини бошлаш учун эҳтимолий шартларни муҳокама қилди. Уч кун олдин у Киевга бориб, Украина етакчиси Владимир Зеленский билан гаплашган. Киев ва Москва сафаридан сўнг Орбан Пекинга ташриф буюрди ва Хитой раҳбари Си Цзиньпин билан учрашди. Ҳукумат раҳбари тинчликпарварлик миссиясини давом эттириш, Вашингтонда, НАТО саммитидаги иштирокини ҳам шу мақсадга йўналтириш ниятида эканини таъкидлади.

Агентлик манбаларидан бири Трамп Орбандан Россия ва Украина ўртасида бирор тинчлик битими учун замин яратишни сўрамаганини қўшимча қилган.

Бўлажак учрашувнинг бошқа тафсилотлари ошкор қилинмаяпти.