Евроиттифоқ Польша чегарасидаги мигрантлар билан боғлиқ инқироз туфайли Беларусга қарши чеклов чораларини кўриш доирасида Россиянинг "Аэрофлот" авиакомпаниясига нисбатан санкция жорий қилиш масаласини муҳокама қилмоқда, деб ёзмоқда Bloomberg агентлиги.

Хабарда таъкидланишича, Россия авиакомпанияси билан бирга Туркия миллий авиаташувчи Turkish Airlines компаниясига ҳам санкция жорий қилиниши мумкин.

"Беларусга қарши чеклов чоралари доирасида Россиянинг "Аэрофлот" ва Туркиянинг Turkish Airlines компанияларига нисбатан санкция жорий қилиш масаласи кўриб чиқилмоқда", — деган Евроиттифоқ мулозими мазкур нашр билан суҳбатда.

Унинг айтишича, Евроиттифоқ чеклов чораларини кейинги ойнинг бошида АҚШ ва Буюк Британия билан биргаликда жорий қилиши мумкин.

Ўз навбатида "Аэрофлот"га яқин бўлган шахс РБК нашрига интервью бериб, авиакомпания қочқинлар оқими келаётган мамлакатларга парвоз қилмаётганини таъкидлаган. Унинг таъкидлашича, "Аэрофлот" Яқин Шарқ мамлакатларидан фақат Миср, Исроил, Эрон ва БАА билан ишламоқда.