АҚШ маъмуриятининг Украинани қўшимча қўллаб- қувватлаш бўйича янги сўрови конгрессга топширилган, деб баёнот берди АҚШ давлат котиби Энтони Блинкен.

"Қўшимча сўров қаршингизда турганидан хурсандман. Бу бизнинг турли йўналишлар бўйича саъй-ҳаракатларимизни қўллаб-қувватлаш учун жуда муҳим", – деди Блинкен сенат қўмитаси олдида ҳисобот берар экан.  

Унинг таъкидлашича, гап Украинани хавфсизлик соҳасида қўллаб-қувватлаш ҳамда иттифоқчиларга ёрдам бериш ҳақида бормоқда.  

Блинкеннинг маълум қилишича, Украина мудофааси бўйича кўрсатилаётган ёрдамга 15,5 миллиард доллар мўлжалланмоқда, 8,5 миллиардлик иқтисодий ёрдамнинг 7,5 миллиарди Украина бюджетини қўллаб-қувватлашга сарфланади. Аввалроқ АҚШ Президенти Жо Байден Украинага қўшимча ёрдам кўрсатиш учун АҚШ конгрессидан 33 миллиард доллар сўрамоқчи экани ҳақида маълум қилинган эди.