Хабар берганимиздек, кеча Швейцарияда етти йиллик терговдан сўнг собиқ ФИФА президенти Зепп Блаттер ва собиқ УЕФА раҳбари Мишель Платинига суд ҳукми эълон қилиниши бўйича иш бошланиши лозим эди.

Судда кўрсатма бериш учун Блаттернинг соғлиги талаб даражасида эмаслиги сабабли иш бир кунга кечиктирилди, дейилади “insidethegames” сайтининг бугунги ахборотида.

Хабарда келтирилишича, швейцариялик 86 ёшли Блаттернинг саломатлиги судда бевосита қатнашишини сўроқ остида қолдирадиган бўлса, етти йиллик тергов натижаси боши берк кўчага кириб қолиши эҳтимолдан йироқ эмас.

Фирибгарлик, давлат маблағини ўзлаштириш ва коррупцияда айбланаётган жаҳон футболининг икки собиқ корчалони 2 миллион доллар миқдоридаги махфий тўлов бўйича айбланмоқда.

1998-2002 йиллар давомида Блаттер ФИФА президенти, франциялик Мишель Платини эса унинг маслаҳатчиси сифатида ишлаган.

Айтиш лозим, Зепп Блаттер 17 йил давомида ФИФАга раҳбарлик қилган. Платини жаҳон футбол майдонидаги ёрқин ўйинлари ҳамда кўҳна қитъа чемпионлигига эришгани учун уч марта “Олтин тўп” соҳиби бўлган.

Т. Рўзиев, ЎзА