Тадбиркорлик субъектларини давлат рўйхатидан ўтказиш Ўзбекистон Республикаси Вазирлар Маҳкамасининг 2017 йил 9 февралдаги қарори билан тасдиқланган “Тадбиркорлик субъектларини давлат рўйхатидан ўтказиш тартиби тўғрисида”ги Низом асосида амалга оширилади.
Мазкур ҳужжат билан 2017 йил 1 апрелдан тадбиркорлик субъектларини давлат рўйхатидан ўтказиш ва ҳисобга қўйишнинг автоматлаштирилган тизими жорий этилиб, рўйхатдан ўтказиш реал вақт режимида, лекин 30 минутдан ошмаган вақтда амалга оширилиши белгиланди.
Тадбиркорлик субъектларини давлат рўйхатидан ўтказиш ва қайта рўйхатдан ўтказиш Давлат хизматлари марказлари томонидан амалга оширилади.
Ўз бизнесини йўлга қуймоқчи бўлганлар тадбиркорлик фаолиятини давлат рўйхатидан ўтказиш учун қуйидаги усуллардан бирини танлаш йўли орқали амалга оширишлари мумкин:
1-усул: Анъанавий тарздаги мурожаат – рўйхатдан ўтказувчи органга ташриф буюрган ҳолда тадбиркорлик субъектини давлат рўйхатидан ўтказиш...
Ўз тадбиркорлик фаолиятингизни рўйхатдан ўтказиш учун Давлат хизматлари марказига борган ҳолда амалга оширсангиз, бу анъанавий тарздаги мурожаат ҳисобланади. Бунда давлат рўйхатидан ўтиш учун базавий ҳисоблаш миқдорининг бир баравари миқдорида давлат божини тўлашингиз, тегишли қоғоз ҳужжатларнинг асл нусхаларини тақдим этишингиз ва аризани тўлдиришингиз лозим.
2-усул: Онлайн тарздаги мурожаат-мустақил равишда интернет тармоғи орқали fo.birdarcha.uz манзилидан тадбиркорлик субъектини давлат рўйхатидан ўтказиш...
Агарда Сиз, тадбиркорлик фаолиятингизни интернет тармоғи тизими орқали рўйхатдан ўтказишга қарор қилсангиз, бу онлайн тарздаги мурожаат ҳисобланади. Бунинг учун исталган жойдан туриб, fo.birdarcha.uz веб-сайтида жойлашган дастур орқали рўйхатдан ўтиш мумкин.
Интернет тармоғи орқали онлайн мурожаат қилинганда, бизнесни рўйхатдан ўтказиш учун белгиланган давлат божининг 90 фоизини тўлов қилган ҳолда, бу ишларни 10 фоиз чегирма билан амалга оширишингиз мумкин.
Рўйхатдан ўтиш жараёнида сўровнома электрон шаклда тўлдириш орқали босқичма-босқич амалга оширилади. Рўйхатдан ўтказиш якунлангач, Сизга тадбиркорлик субъекти давлат рўйхатидан ўтказилганлиги тўғрисидаги гувоҳнома электрон шаклда берилади.
Интернет тармоғи орқали тадбиркорлик фаолиятини давлат рўйхатидан ўтказишнинг афзалликлари шундаки, рўйхатдан ўтказувчи органга қоғоз шаклидаги ҳужжатларнинг асл нусхаларини тақдим этишга зарурат қолмайди ва бизнесни рўйхатдан ўтказиш учун ҳужжатларни расмийлаштириш ва топширишни аризачи учун қулай бўлган вақтда бошлаш, тўхтатиб туриш ёки қайтадан бошлаш мумкин.
Шуни ҳам маълумот ўрнида эслатиб ўтиш керакки, тадбиркорлик субъектини давлат рўйхатидан ўтказгач, ҳар икки усулда ҳам дастур орқали хизмат кўрсатувчи банклардан бирини хоҳишингизга кўра танлашингиз ҳамда банк ҳисоб рақамини очиш имконияти мавжуд.
Бу ҳақда электрон дастур орқали Сизга, ҳисоб рақам очилган банк номи ва ҳисоб рақамингиз кўрсатилган ҳолда маълумот тақдим этилади.
А.Оразимбетов, Тахиатош тумани
Давлат хизматлари марказининг ходими