Мамлакатимизда кичик бизнес ва тадбиркорликни ривожлантириш бугунги ислоҳотлар асосини ташкил этади.

Президентимиз Шавкат Мирзиёевнинг 2019 йил 13 августда қабул қилинган "Ўзбекистон Республикаси Иқтисодиёт ва саноат вазирлиги ҳузуридаги Кичик бизнес ва тадбиркорликни ривожлантириш агентлиги фаолиятини ташкил этиш тўғрисида"ги қарорининг ижроси айнан шу ишлар ривожига қаратилган.

Мазкур жараёнда хорижий тажрибани ўрганиш ва амалиётга татбиқ этиш муҳим аҳамиятга эга. Шундан келиб чиқиб, бугунги кунда вазирлик ҳузуридаги агентлик ва Россиянинг кичик бизнес ва тадбиркорликни ривожлантириш федерал корпорацияси ўртасида имзоланган ўзаро англашув меморандуми доирасида икки томонлама ҳамкорликни йўлга қўйиш мақсадида "Йўл харитаси" ишлаб чиқилди.

Ушбу ҳужжатни расмий имзолаш мақсадида Россиянинг кичик бизнес ва тадбиркорликни ривожлантириш федерал корпорацияси вакиллари пойтахтимизда меҳмон бўлиб турибди.

Бугун Иқтисодиёт ва саноат вазирлигида Россиянинг кичик бизнес ва тадбиркорликни ривожлантириш федерал корпорацияси "Бизнес-навигатор" порталининг тақдимоти бўлиб ўтди. 

Маҳаллий ва хорижлик мутахассилар иштирок этган тадбирда Иқтисодиёт ва саноат вазирлиги ҳузуридаги кичик бизнес ва тадбиркорликни ривожлантириш агентлиги директори Ғанишер Маматқулов ва Россиянинг кичик бизнес ва тадбиркорликни ривожлантириш федерал корпорацияси бош директори ўринбосари Никита Банцекин икки давлат ўртасидаги ҳамкорлик юқори босқичга кўтарилиб, бу ишбилармонлик салоҳиятини оширишда ҳам муҳим ўрин эгаллаётганини таъкидлади.

– 2019 йил ноябрь ойида агентлик ва корпорация ўртасида ҳамкорлик келишуви имзоланган эди, – деди Иқтисодиёт ва саноат вазирлиги ҳузуридаги кичик бизнес ва тадбиркорликни ривожлантириш агентлиги бўлим бошлиғи Шуҳрат Элмуродов. – Бундан кўзланган мақсад эса соҳа ривожи бўйича Россия тажрибасини ўрганиб, юртимизда кичик бизнес ва тадбиркорлик билан шуғулланаётган, ёки шу йўналишда ўзининг имкониятларини синаб кўрмоқчи бўлган юртдошларимизни ҳар томонлама қўллаб-қувватлашга қаратилган. Бугунги тадбирда корпорация вакиллари "Бизнес-навигатор" портали ва унинг натижаларини намойиш этди. Хўш, бу тақдимотнинг афзаллиги нимада? Унда Россия давлатида фаолият кўрсатаётган тадбиркорлик субъекларининг харитаси жамланган. Тадбиркор бошламоқчи бўлган лойиҳаси келажагини билишда шу портал фаолияти жуда қулай ва афзалдир.

Маълумот берилганидек, Россиянинг кичик бизнес ва тадбиркорликни ривожлантириш федерал корпорациясининг кичик ва ўрта тадбиркорлик "Бизнес-навигатор" портали уч йилдан буён фаолият кўрсатмоқда. 2020 йилнинг 10 январь ҳолатига кўра, ушбу порталга кирувчилар сони 6,3 миллион, рўйхатдан ўтган фойдаланувчилар сони эса 2,48 миллионни ташкил этган. Порталнинг хизматларидан 1 350 167 та кичик ва ўрта тадбиркорлик субъекти фойдаланган. Ўтган вақт давомида даромадни оширган кичик ва ўрта тадбиркорлик субъектларининг умумий сони 700 000 га яқиндир.

– Корпорациямиз ўзининг беш йиллик тажрибасига эга, – деди Россиянинг кичик бизнес ва тадбиркорликни ривожлантириш федерал корпорацияси бош директори ўринбосари Никита Банцекин. – Кичик бизнес ва тадбиркорлик субъектларини қўллаш ниятида шу портални яратдик. Бу дастур ўзида жуда катта тузилмаларни қамраб олган. Бунда биз порталдан фойдаланган тадбиркорлар қандай фойда олганига эътибор қаратдик. Буни эса корпорациямиздаги солиқ хизмати назорат қилиб боради. Албатта, ўтган қисқа муддатда бу ишимиз ўзининг натижасини кўрсатди. Бугун эса ўзбекистонлик ишбилармонларга шу лойиҳани тақдим этдик. Юртингизга бу тажрибани татбиқ этиш бўйича қўшма ишчи гуруҳи ҳам ташкил этилаяпти.