Жорий йилнинг 11 апрель куни ўзаро жанжал туфайли Хатирчи тумани Олтинсой маҳалласида яшовчи К.Б. ўз укаси К.А.га тан жораҳати етказган. Натижада, ука шифохонага жойлаштирилган. Бу ҳақда Навоий вилояти ички ишлар бошқармаси ахборот хизмати хабар бермоқда.

Карантин даврида зерикиш ва руҳий зўриқишни важ қилиб, жаҳлини жиловлай олмаган оқибатсиз ака укага етказган тан жароҳати сабаб жавобгарликка тортилди.

Миллатимизда меҳр-оқибат оилада фарзанд гўдаклигидан шакллантириладиган ва қон-қонга сингиб кетадиган асл қадрият ҳисобланади. Аканинг укага нисбатан тан жароҳати етказганлигини ўрганиш жараёнида аниқланган сабаблар ва оқибатларни таҳлил қилиб, оиладаги мавжуд муҳитдан ёқа ушлайсиз.

Томирида бир ота-онанинг қони оқишига қарамасдан, оиладаги меҳр-оқибатсизлик ака-укаларни душманга айлантирди. Эт билан тирноқни ажратиб бўлмаганидек, ака билан ука орасидан меҳр риштасини ажратиб бўладими аслида?! Биз қаерга қараб кетаяпмиз? Катта давраларда юқори минбарлардан туриб, маъруза учун гапирилган “оммавий маданият” ўзбек минталитетига кескин таъсир ўтказаяптими? Бизга нима бўлаяпти ўзи, одамлар?