"Ўзбекипаксаноат" уюшмасида 2023 йилнинг ярим йиллик прогноз параметрлари муҳокамасига бағишланган онлайн йиғилиш бўлиб ўтди.

Йиғилишда Президентимизнинг жорий йил 1 июндаги “Пиллачилик соҳасида касаначиликни қўллаб-қувватлаш ҳамда пилла етиштириш учун озуқа базасини янада кенгайтиришнинг қўшимча чора-тадбирлари тўғрисида”ги фармони ижроси, бандлик кўрсаткичлари, ипак маҳсулотлари экспорти ҳамда тўлов интизоми масалалари муҳокама қилинди.  

Қайд этилганидек, республикамизда пиллачилик мавсумларини самарали ташкил этиш ва ипакчилик саноати корхоналарини хомашё билан таъминлаш мақсадида 443,5 минг қути ипак қурти парваришланиб, 25,8 минг тонна (режа 25,7 минг тонна) пилла хомашёси етиштирилди ҳамда ўтган йилга нисбатан ўсиш суръатлари 107 фоизга етказилди.    

Давлатимиз раҳбарининг 2022 йил 28 декабрдаги “Ўзбекистон Республикасининг 2023–2025 йилларга мўлжалланган инвестиция дастурини амалга ошириш чора-тадбирлари тўғрисида”ги қарорига кўра, ярим йиллик якуни билан умумий қиймати 7 миллион доллар бўлган 5 та янги лойиҳа ишга туширилди.  

Шунингдек, жорий ярим йилликда 1 145,7 миллиард сўмлик ипак маҳсулотлари ишлаб чиқарилиб, ўтган йилнинг мос даврига нисбатан ўсиш суръатлари 134,4 фоизга етказилди. Биринчи ярим йиллик якунлари билан 31,5 миллион долларлик ипак маҳсулотлари экспорти амалга оширилиб, ўтган йилнинг мос даврига нисбатан (25 млн доллар) ўсиш суръатлари 126 фоизга оширилди.  

Гулноза Бобоева, ЎзА