Ҳозир юртимизда коронавирусдан ташвишга тушмаган кишининг ўзи йўқ. Ҳар бир киши эрта тонгдан биринчи навбатда оммавий ахборот воситалари, интернет тармоқлари орқали мамлакатда коронавирус билан боғлиқ вазиятдан хабардор бўлишга ҳаракат қилади. Давлатимиз томонидан кўрилаётган чора-тадбирлар туфайли вазият тўлиқ назоратда тутиб турилганидан кўнгли таскин топади.

Бугун куннинг шундай бошланиши кўпчилик, айниқса, халқимиз саломатлигини сақлашга масъул бўлган тиббиёт ходимлари учун одатдаги ҳолга айланди. Шифокорларнинг, қайси соҳа мутахассиси, қандай вазифада ишлашидан қатъий назар уларнинг иш куни ушбу инфекция тарқалишининг олдини олишга ҳиссасини қўшиш билан бошланиб, шу билан якунланаётир.

Президентимизнинг коронавирус инфекцияси тарқалишига қарши курашишни кучайтириш масалаларига бағишланган видеоселекторда биз шифокорларга қарата Ўзбекистон халқи номидан айтган миннатдорлик сўзларидан, ҳукуматимизнинг айни қийин кунларда ишлаётган тиббиёт ходимларини моддий рағбатлантириш бўйича белгилаган чора-тадбирлар хизмат бурчимизни сидқидилдан ўташда куч-ғайрат бағишламоқда.

Вилоятимизда коронавируснинг олдини олиш борасидаги профилактика ишлари изчиллик билан олиб борилмоқда. Бу борада барча зарурий чоралар кўрилаяпти.

Жорий йил 30 март соат 14:00 ҳолатига Жиззах вилоятида коронавирус юқтириб олиш ҳолати қайд этилмади.

Коронавирус билан касалланган шахслар билан бирламчи мулоқотда бўлганлиги сабабли, вилоят юқумли касалликлар шифохонасининг махсус боксларига ётқизилган жами 20 нафар фуқаронинг шу кунгача 19 нафарига уларнинг таҳлилларида коронавирус инфекцияси аниқланмагани учун уйларига жавоб берилди.

Айни пайтда вилоят юқумли касалликлар шифохонасида 1 нафар фуқаро тиббий кузатувда қолмоқда.

Шу кунгача хорижий давлатлардан вилоятга келган 1 минг 843 нафар фуқаро тиббий кузатувга олинган. Улардан бугунги кун ҳолатига 678 нафари назоратдан чиқарилди. Назоратда қолган 845 нафар фуқаро ва уларнинг оила аъзолари уй шароитида карантин белгиланган тартибда карантин муддатини ўтаётир.

Соғлиқни сақлаш бошқармасининг тизимидаги даволаш профилактик муассасаларининг умумий амалиёт шифокорлари ва патронаж ҳамширалари томонидан ҳудудларда кунлик назорат ишлари кучайтирилиб, хонадонларда, иш жараёни давом этаётган муассасаларда тарғибот ишлари изчиллик билан олиб борилмоқда.

Давлатимиз томонидан белгиланган чора-тадбирларнинг изчил ва сўзсиз бажарилиши, биргаликдаги ҳаракатларимиз ушбу касаллик тарқалишини тезроқ тўхтатишга олиб келади албатта.