Жорий йилнинг 22 февраль куни Россиянинг Санкт-Петербург шаҳрида юз берган воқеа инсонпарварлик ва жасоратнинг ёрқин намунасига айланди. Еттинчи қаватдан тушиб кетган болани қутқариб қолган Хайрулла Ибодуллаевнинг фидокорона ҳаракати жамоатчилик томонидан катта эътироф этилди. Ушбу жасорати учун у мамлакатимиз Президенти фармони билан “Жасорат” медали билан тақдирланди.

Қаҳрамоннинг Қашқадарё вилояти, Ғузор туманида истиқомат қилиши юртдошларимиз учун алоҳида ифтихор манбаи бўлди. ЎзА мухбири “Тошгузар” маҳалласида жойлашган Ариқошган қишлоғида унинг яқинлари билан суҳбатлашди.

1989 йилда туғилган Хайрулла Ибодуллаев турмуш ўртоғи ва тўрт нафар қиз фарзанди билан қишлоқда яшайди. Тирикчилик ташвиши билан у бир неча йиллар давомида Тошкент шаҳрида ҳамда Россия Федерациясида меҳнат қилиб келган.

Яқинларининг айтишича, Хайрулла болалигиданоқ ҳаёт синовларини бошидан кечирган – у уч ойлигида онасидан айрилган. Шу сабаб унинг кўнгли нозик, қалби меҳрибон бўлиб улғайган. У ҳеч қачон фақат ўз манфаатини ўйламайди, балки ёрдамга муҳтожни кўрса, бефарқ ўтиб кетолмайди. Отасининг таъкидлашича, ўғлининг кечаги жасорати айнан ана шу тарбия ва ҳаёт тарзининг мантиқий давомидир.

[gallery-27843]

Турмуш ўртоғи ҳам ушбу воқеа уни ҳайратга солмаганини айтади. Чунки Хайрулла ҳар доим кимгадир ёрдам берса, шунинг ўзига қувонади. Воқеа содир бўлган пайтда ҳам у болани кўриб, кўз олдига ўз фарзандлари келганини, шу туйғу уни дарҳол ҳаракатга ундаганини айтган.

Опасининг сўзларига кўра, у учун яхшилик бир марталик ҳолат эмас. Россияга кетишидан олдин ҳам оғир аҳволдаги қизалоққа донорлик қилиб, унинг ҳаётини сақлаб қолишга ҳисса қўшган. Шу боис “Жасорат” медали билан тақдирлангани оила учун кутилмаган, аммо жуда қувонарли воқеа бўлган.

Қўшнилар эса уни фақат жасоратли инсон эмас, балки кўпчиликка йўл очиб берган фидойи шахс сифатида таърифлайди. Айниқса, у Олой деҳқон бозорида ишлаб юрган йилларда қишлоқдан ўнлаб йигитларни иш билан таъминлаб, уларнинг оёққа туришига сабабчи бўлгани алоҳида таъкидланади.

Маълумотларга кўра, Хайрулла Ибодуллаев Россияда ҳам ушбу жасорати учун муносиб тақдирланган. У Тигран Кеосаян номидаги мукофот – 1 миллион рубль пул билан рағбатлантирилган. Ушбу мукофот Маргарита Симонян ташаббуси билан таъсис этилган бўлиб, болалар ва заиф инсонларни ҳимоя қилган фидокорларни қўллаб-қувватлашга қаратилган.

<iframe width="650" height="420" src="https://www.youtube.com/embed/NHWr8MKXGLw" title="Bir jasorat – bir umrlik ibrat" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ўлмас Баротов, Жамшид Норқобилов (видео), ЎзА мухбирлари