Sirdaryo viloyati musiqali drama teatrida Prezidentimizning joriy yil 19 yanvardagi “Mahallalarda yoshlar tarbiyasi bilan shug‘ullanishni tubdan takomillashtirish chora-tadbirlari to‘g‘risida”gi qarorining 5-bandi bo‘yicha "Bir nuroniy o‘n yoshga mas’ul" tamoyili asosida tashkil etilgan ko‘rik-tanlovning viloyat bosqichi bo‘lib o‘tdi.

Tanlovda viloyatning turli  hududlaridan kelgan 11 nafar ishtirokchi tanlov shartlari bo‘yicha o‘zaro bahslashdi.

- Mahallamizdagi  o‘zimga biriktirilgan yoshlarning bir nechtasiga davlatdan kam foizli  kredit olib, issiqxona qurishi,  parrandachilikni rivojlantirishi,  oziq-ovqat do‘koni, novvoyxona ochib, daromad qilib,  ro‘zg‘origa baraka kiritishiga ko‘maklashdim, - deydi  sardobalik K.Boltayev.

Ishtirokchilar o‘z  chiqishlarida mahalladagi yoshlarni  qo‘llab-quvvatlash borasidagi ibratli va xayrli ishlar to‘g‘risida aytib berdi.

Ko‘rik-tanlov g‘oliblari e’lon  qilindi. Guliston shahri vakili  Xudoynazar Mavlonqulov 1-o‘ringa, shirinlik Ra’no Rahmonqulova 2-o‘ringa va  Guliston tumani vakili Rustam Atakishiyev 3-o‘ringa sazovor bo‘ldi. G‘oliblarga pul mukofotlari topshirildi.

Shuningdek, boshqa  ishtirokchilar ham qimmatbaho sovg‘alar bilan taqdirlandi.

Ko‘rik-tanlov g‘oliblarini taqdirlash marosimida Oliy Majlis  senati a’zosi, viloyat xokimi  G‘ofurjon Mirzayev, O‘zbekiston Qaxramoni,  Respublika  Mahalla va nuroniylarni  qo‘llab-quvvatlash vazirining birinchi o‘rinbosari, senator Sodiqjon Turdiyev, respublika "Nuroniy" jamg‘armasi  raisi o‘rinbosari Sharof  Ubaydullayev ishtirok etdi.

Tadbir davomida bir guruh mehnat faxriylariga "Mehnat faxriysi" ko‘krak nishonlari   topshirildi.

Viloyat maqom ansambli tomonidan konsert dasturi namoyish etildi.

Shuhrat Suyarov, Furqat Toshmatov,(surat), O‘zA