Фуқаро А.Т. ва бошқалар 1902 йилда ишлаб чиқарилган, оғирлиги 32,22 грамм бўлган бир дона “Николай-2" олтин тангасини 100 минг АҚШ долларига сотаётган вақтда ашёвий далиллар билан ушланди.

Бу Бош прокуратура ҳузуридаги Иқтисодий жиноятларга қарши курашиш Департаментининг Яккасарой тумани бўлими томонидан ДХХ ва Тошкент шаҳар Ички ишлар бош бошқармаси  ходимлари билан ҳамкорликда ўтказилган тезкор тадбирда фош этилди.  

Маданий мерос агентлигининг хулосасига кўра, ушбу олтин танганинг бугунги кундаги баҳоси 1 миллиард сўмни ташкил этади.  

Мазкур ҳолат юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.

Бундан олдин 1876 йилда ишлаб чиқарилган олтин тангаларни сотаётган шахслар ушланган эди. Бош прокуратура ҳузуридаги Департаментнинг Қибрай тумани бўлими томонидан ДХХ ходимлари билан ҳамкорликда ўтказилган тезкор тадбирда фуқаролар Б.А. ва М.У. умумий оғирлиги 76,2 грамм бўлган 2 дона олтин тангани 145 минг АҚШ долларига сотаётган вақтда ашёвий далиллар билан ушланган. Мазкур ҳолат юзасидан ҳам Жиноят кодексининг 177-моддаси билан жиноят иши қўзғатилган.  

Н.Абдураимова, ЎзА