Бир мавсумда 2 минг 160 тонна асал
Андижон вилоятида асал етиштириш билан шуғулланувчи фермер ва деҳқон хўжаликлари, якка тартибдаги тадбиркорлар томонидан 2017 йилда 1 минг 900 тонна асал етиштирилган бўлса, жорий йилда бу кўрсаткич 2 минг 160 тоннага етди.
Андижон вилоятида асал етиштириш билан шуғулланувчи фермер ва деҳқон хўжаликлари, якка тартибдаги тадбиркорлар томонидан 2017 йилда 1 минг 900 тонна асал етиштирилган бўлса, жорий йилда бу кўрсаткич 2 минг 160 тоннага етди.Бу ҳақда Андижон шаҳридаги “Марказий деҳқон бозори“да ўтказилаётган “Асал байрами ва асал маҳсулотлари“ миллий кўргазма-ярмаркасида маълумот берилди.
– Ҳозирда асаларичиларимиз 32 минг 480 қути асалари уясини парваришламоқда, – дейди Асаларичилар уюшмаси Андижон вилояти бўлими раҳбари Содиқжон Мўминов. – Авваллари бир қути асалари уясидан 5-6 килограмм асал олинган бўлса, илғор технология ва иш услубларини қўллаш ҳисобига бугун тажрибали асаларичилар ҳар қутидан 8-10 килограммгача маҳсулот олишга эришмоқда.
Қарийб 700 нафар асаларичини бирлаштирган Асаларичилар уюшмаси вилоят бўлими ташаббуси билан вилоят ҳокимлиги, қишлоқ хўжалиги бошқармаси ҳамда “Алоқабанк” АТБ вилоят филиали ҳамкорлигида Андижон шаҳрида ўтказилаётган кўргазма-ярмаркада эллик нафарга яқин асал етиштирувчи аҳолига 15 турдан ортиқ сифатли ва шифобахш асал тақдим этмоқда.
Асаларичиликни ривожлантириш мақсадида биргина “Алоқабанк” АТБ вилоят филиали томонидан 23 асаларичига 1 миллиард 350 миллион сўм миқдорида кредит берилган.
– Асал нафақат шифобахш неъмат, балки яхшигина даромад манбаи ҳамдир, – дейди кўргазма иштирокчиси, Булоқбоши тумани Гулистон маҳалласида яшовчи Одилжон Ўринов. – Бир неча йилдан буён асаларичилик билан оилавий шуғулланиб келамиз. Банкдан кредит олиб, фаолиятимизни янада кенгайтирдик. Ҳозир 150 та асалари уясини парвариш қиламиз, йилига 1-1,5 тонна асал оламиз.
Ноябрь ойининг охирига қадар давом этадиган кўргазма-ярмарка доирасида асосий ва қатор номинациялар бўйича энг яхши асаларичилар аниқланиб, уларга “Асал байрами”нинг республика босқичида қатнашиш учун йўлланма берилади.
Ноябрь ойининг охирига қадар давом этадиган кўргазма-ярмарка доирасида асосий ва қатор номинациялар бўйича энг яхши асаларичилар аниқланиб, уларга “Асал байрами”нинг республика босқичида қатнашиш учун йўлланма берилади.