Францияда биатлон бўйича жаҳон кубогининг учинчи босқичи ўз якунига етди. Мусобақанинг сўнгги кунида эркаклар 15 км., аёллар эса 12,5 км. масофада масс-старт пойгасида беллашди.

Аёллар ўртасидаги баҳсларда норвегиялик Марен Киркеэйде 32 дақиқа 53,2 сония натижа билан маррага биринчи бўлиб етиб келди. Бир маротаба нишонни бой берган франциялик Лу Жанмонно 0,3 сония фарқ билан иккинчи ўринни эгаллаган бўлса, яна бир франциялик Жюстин Бреза-Буше (+0,8, 1 промах) кучли учликни якунлади.

Эркаклар ўртасида эса италиялик Томмазо Джакомель 15 км. масофани 33 дақиқа 35,1 сонияда босиб ўтиб, ғолибликни қўлга киритди. Франциялик Эрик Перро 18,1 сония ортда қолган ҳолда иккинчи бўлди. Норвегиялик Ветле Шёста Кристиансен (+21,3) учинчи натижани қайд этди.

Шу тариқа, жаҳон кубогининг учинчи босқичи якунларига кўра, эркаклар ўртасида норвегиялик Йохан-Олав Ботн 560 очко билан умумий ҳисобда етакчилик қилмоқда. Иккинчи ўринда 447 очко жамлаган Эрик Перро бўлса, Томмазо Джакомель 431 очко билан учинчи поғонани эгаллаб турибди.

Аёллар ўртасида франциялик Лу Жанмонно 481 очко билан жаҳон кубоги умумий ҳисобида пешқадам. Норвегиялик Марен Киркеэйде 413 очко билан иккинчи, италиялик тажрибали биатлончи Доротея Вирер 363 очко билан учинчи ўринда бормоқда.

Жаҳон кубогининг тўртинчи босқичи 8-11 январь кунлари Германиянинг Оберхоф шаҳрида бўлиб ўтади. Унда қуйидаги пойгалар дастурга киритилган:

8 январь. Эркаклар – 10 км. спринт;

9 январь. Аёллар – 7,5 км. спринт;

10 январь.  Эркаклар – 12,5 км. қувиш пойгаси,  

аёллар – 4 × 6 км. эстафета;

11 январь. Эркаклар – 4 × 7,5 км. эстафета,  

аёллар – 10 км. қувиш пойгаси.

Жавоҳир Тошхўжаев, ЎзА