Ayni damda so‘lim go‘shalarda joylashgan oromgohlar bolajonlarning sho‘x shodon kulgisiga to‘la. Surxondaryo viloyati Sherobod tumanida joylashgan “Beshbuloq” yozgi bolalar oromgohida viloyatning barcha tumanlaridan kelgan bolalar miriqib dam olmoqda.

Oromgoh mavsum davomida har bir navbatda 260 nafar bolani o‘z bag‘riga olmoqda. Baland tog‘lar bag‘rida joylashgan oromgohda bolajonlar uchun barcha sharoitlar yaratilgan. Dam olish mobaynida o‘z sohasining tajribali mutaxassislari bo‘lgan tarbiyachilar tomonidan turli tanlovlar, musobaqalar o‘tkazilmoqda. Shuningdek, ko‘ngilochar shoular, konsert dasturlari, qo‘g‘irchoq teatri va sirk tomoshalari ham bolajonlarga bir olam quvonch bag‘ishlamoqda.      

[gallery-12782]

Oromgohda dam oluvchilarning vaqtini mazmunli tashkil etish hamda ularni sportga oshno qilish maqsadida “Sportni sev, sport bilan yasha” shiori ostida shaxmat-shashka, stol tennisi, voleybol, futbol musobaqalari bo‘lib o‘tmoqda. Bundan tashqari, rassomchilik to‘garaklari, chet tillari bo‘yicha tashkil etilgan kurslarda ham bolajonlar faol ishtirok etyapti.

“Yosh kitobxon”, “Men sevgan asar” tanlovlari esa dam oluvchilarning intellektual salohiyatini yuksaltirishga xizmat qilmoqda.  

Ma’lumot o‘rnida, 2023 yil sog‘lomlashtirish mavsumi 4 navbatdan iborat bo‘lib, ularning har biri 12 kundan davom etadi.

Jonibek QO‘ZIMURODOV (surat), O‘zA