Андижонда “Беш ташаббус олимпиадаси”нинг 2024 йил мавсумига старт берилди.

Машҳур спортчилар, кенг жамоатчилик вакиллари иштирокида жорий йил мавсуми бошланишига бағишлаб ўтказилган тадбирда сўз олганлар томонидан Президентимиз ташаббуси билан маҳалла, умумтаълим мактаблари, профессионал касб таълими муассасалари ўқувчилари, олий ўқув юртлари талаба- ёшларининг бўш вақтини мазмунли ташкил этиш, миллий спорт ўйинлари ва спорт турларини ёшлар ўртасида оммалаштириш, ёшларнинг ижтимоий фаоллигини ошириш, иқтидори, истеъдоди ва ташаббусларини қўллаб-қувватлаш, рағбатлантириш ҳамда ҳаётда ўз ўрнини топишига кўмаклашиш мақсадида ўтказиб келинаётган “Беш ташаббус олимпиадаси” ёшларга кенг имкониятлар эшигини очиб бераётганлиги таъкидланди. 

“Беш ташаббус олимпиадаси” доирасида маҳалла ёшларидан тузилган жамоалар ўртасида “Заковат”, “Қувноқлар ва зукколар” интеллектуал ўйинлари, “Ёшлар рақс” фестивали, “Ёш китобхон”, “Миллий ва замонавий чолғу ижрочилиги” кўрик-танловлари, шунингдек, спортнинг шахмат-шашка, “Street Workout”, енгил атлетика, стол тенниси, волейбол, стритбол, миллий кураш, киберспорт, умуман, 26 йўналиш бўйича фестиваль, танлов ва спорт мусобақалари ўтказилади. 

[gallery-16347]

– “Беш ташаббус олимпиадаси”нинг фестиваль, танлов ва спорт мусобақалари ёшлар орасида кенг оммалашиб бормоқда, – дейди Ёшлар ишлари агентлиги Андижон вилояти бошқармаси бўлим бошлиғи Улуғбек Қобилжонов. – Ўтган йили олимпиаданинг биринчи ва иккинчи мавсумлари доирасидаги тадбирларда вилоятдаги 909 та маҳалладан қарийб 740 минг нафарга яқин ёш иштирок этган. Жорий йилда ҳам танлов ва спорт мусобақаларида ёшларимиз янада фаол қатнашади. 

Жорий йилдаги танлов ва мусобақаларда корхона, ташкилотларнинг 30 ёшгача бўлган ёш ходимлари ҳам иштирок этиши белгиланган. 
“Беш ташаббус олимпиадаси” танлов ва спорт мусобақалари жамоалар ўртасида сектор, туман, шаҳар, вилоят босқичлари доирасида бўлиб ўтади. 

Ф. Убайдуллаев, З. Умрзоқов (сурат), ЎзА мухбирлари