Андижон машинасозлик институти ректори Умид Турдиалиев Бельгия таълим Кенгаши вакиллари билан учрашувди.

Кейинги йилларда мамлакатимизда илм-фан ривожига, айниқса, олий ўқув юртлари моддий-техника базасини мустаҳкамлаш, ўқитиш тизимига халқаро андозаларни жорий этиш, халқаро ҳамкорликни йўлга қўйиш ва мустаҳкамлаш масалаларига алоҳида эътибор қаратилмоқда. Жумладан, Андижон машинасозлик институти ҳам дунёдаги қатор етакчи олий ўқув юртлари билан ҳамкорлик қилиб келмоқда. Бельгия таълим кенгаши билан ҳамкорликнинг йўлга қўйилганлиги ана шу йўналишдаги ишлардан бири бўлди.  

Институт ректорининг Бельгия таълим Кенгаши вакиллари Оксана Позднякова ҳамда Елена Локтева билан учрашувда таълим, илм-фан соҳаларида Белгия таълим кенгаши билан ҳамкорликни йўлга қўйиш, профессор-ўқитувчиларнинг малакасини ошириш ва стажировка ўташи, халқаро грантларни ҳамкорликда амалга ошириш масалалари муҳокама қилинди. Ўзаро музокаралар давомида ҳамкорликда грант лойиҳаларни амалга ошириш, институт профессор-ўқитувчиларининг Европа иттифоқи бўйлаб стажировкаларини ташкил этиш ҳамда таълим жараёнига оид бошқа масалалар бўйича келишувга эришилди. Шундан сўнг Андижон машинасозлик институти ҳамда Бельгия таълим кенгаши ўртасида келишув меморандуми имзоланди.  

– Андижон машинасозлик институти ректорининг икки томонлама ҳамкорлик ўрнатиш бўйича таклифи билан Ўзбекистонга, Андижонга келдик, – дейди Бельгия таълим кенгаши вакили Оксана Позднякова. – Бу ерда институт фаолияти, талабаларни ўқитиш борасида олиб борилаётган ишлар билан яқиндан танишдик. Институт европадаги қатор етакчи олий ўқув юртлари билан ҳамкорлик қилиш имконияти ва салоҳиятига эга эканлиги бизни қувонтирди. Ишонаманки, Бельгия таълим кенгаши ва институт ўртасида ҳамкорлик шубҳасиз, ҳар икки томон учун фақат фойдали бўлади.  

Ф. Убайдуллаев,

З. Умрзоқов (фото), ЎзА