Мамлакатимизда Ўзбекистон Республикаси мустақиллигининг 31 йиллиги шодиёналари тобора яқинлашгани сайин жойларда спорт мусобақалари, турли чемпионатлар ўтказилмоқда. Бу эса байрамни муносиб ютуқлар билан қаршилаш асносида иқтидорли спортчиларни саралашда қўл келмоқда.

Наманганнинг Мингбулоқ туманида миллий қадриятимизнинг ажралмас қисми бўлган белбоғли кураш бўйича эркаклар ва аёллар ўртасида ўтган Ўзбекистон чемпионати ҳам айни тамойиллар асосида ташкил этилди. 

Қорақалпоғистон Республикаси, вилоятлар ва Тошкент шаҳрининг 400 нафарга яқин полвонлари иштирок этган чемпионат спортчилар учун ҳам, кураш ишқибозлари учун ҳам чинакам байрам кўринишини олди. 

Мусобақада эркаклар белбоғли курашнинг эркин ва классик йўналишларида 8 тадан вазн тоифасида, хотин-қизлар эса эркин йўналишда 5 та вазн тоифасида ғолиблик учун беллашди.  

Шиддатли баҳсларга бой бўлган чемпионатда ўз йўналиш ва вазнларида ўғил болалардан Нодирбек Абдумаликов, Шохруҳ Зокиров, Ойбек Султонов, Ҳусниддин Рўзиев, Шохжаҳон Ортиқов ва Бахтиёр Жумабоев каби спортчилар ғолибликни тантана қилган бўлса, қизлар ўртасида Фотима Турсунбоева, Уллижон Давлетова, Бийбигавҳар Полатбоева, Фелура Эргашева ҳамда Раҳима Йўлдошева чемпионликка эришди. 

– Мингбулоқда ўтган баҳслар жорий йилнинг 8-11 сентябрь кунлари мамлакатимизда белбоғли кураш бўйича ташкил этиладиган навбатдаги жаҳон чемпионатида иштирок этадиган Ўзбекистон терма жамоасини шакллантириб олиш вазифасини ўтади. Шу боисдан ҳар бир вазндаги курашлар жуда муросасиз кечди, – дейди Ўзбекистон белбоғли кураш федерацияси раиси Равшан Дастиров. 

Уч кун давом этган чемпионат якунларига кўра, ғолиб ва совриндорлар диплом, медаль ва эсдалик совғалари билан тақдирланди.  

Т.Рўзиев,  
ЎзА