Профессионал бокснинг иккинчи ўрта вазн тоифасида жанг олиб борадиган ҳамюртимиз Бектемир Мелиқўзиев Бутунжаҳон бокс ассоциацияси (WBA) рейтингида биринчи ўринга кўтарилиб олди.

Мазкур вазнда мексикалик 26 ёшли Хосе Армандо Ресендис WBA чемпионлик камарининг тўлақонли эгасига айланди.

2025 йилнинг май ойида Калеб Плантни мағлуб этган Ресендис вақтинчалик WBA чемпионлик камарини қўлга киритганди. Теренс Кроуфорднинг профессионал боксдаги фаолиятини якунлаши Ресендисни ушбу оғирликда чемпионлик камарининг тўлақонли эгаси бўлишига олиб келди.

Бу, ўз навбатида Бектемир Мелиқўзиевга рейтингда биринчи ўринга кўтарилиши билан бирга чемпионлик камарига мажбурий даъвогарликни тақдим этди.

Эслатиб ўтамиз, боксчимиз Мелиқўзиев шу кунларда АҚШнинг Индио шаҳрида мексикалик мураббийи Жоэль Диас қўл остида машғулотларни давом эттирмоқда. Бектемир ўтган йил май ойида ўтказилган сўнгги жангида америкалик Дариус Фулгхэмни очколар ҳисобида мағлуб этганди.

Т.Рўзиев,

ЎзА