Тошкент вилоятида қурилиши тугалланмаган ва бўш турган иншоотлардан самарали фойдаланиш, улар таркибида ишлаб чиқаришни ташкил этиш орқали кичик бизнесни ривожлантириш ҳамда янги иш ўринлари яратишга алоҳида эътибор қаратилмоқда.

Тошкент вилоятида қурилиши тугалланмаган ва бўш турган иншоотлардан самарали фойдаланиш, улар таркибида ишлаб чиқаришни ташкил этиш орқали кичик бизнесни ривожлантириш ҳамда янги иш ўринлари яратишга алоҳида эътибор қаратилмоқда.

Бу борада Бекобод шаҳрида ҳам изчил ишлар амалга оширилаётир.

Мустақиллик йилларида кичик бизнес ва хусусий тадбиркорлик халқимиз учун барқарор даромад манбаларини шакллантириш омилларидан бирига айланди. Мамлакатимизда тадбиркорлар ҳуқуқ ва манфаатларининг ҳимоя қилинаётгани соҳа ривожи учун кенг йўл очди. Бу борада Ўзбекистон Республикаси Биринчи Президенти Ислом Каримовнинг 2014 йил 3 июлдаги “Давлат мулки объектларини кичик бизнес ва хусусий тадбиркорлик субъектларига сотиш борасидаги қўшимча чора-тадбирлар тўғрисида”ги қарори муҳим дастуриламал бўлмоқда.

– Мазкур қарор ижроси доирасида ўтган давр мобайнида танлов асосида инвестиция киритиш ва янги иш ўринлари яратиш шарти билан “ноль” қийматда белгиланган 13 давлат активидан 11 таси тадбиркорларга берилди, – дейди Бекобод шаҳар ҳокимлиги бўлим бошлиғи Даврон Янгибоев. – Бунда тадбиркорларга қўйиладиган асосий талаб – ушбу иншоотга белгиланган муддатда инвестиция киритиш, замонавий технология келтириб ўрнатиш, реконструкция ишлари ёки бошқа моддий бойликларни киритиш натижасида қўшимча иш ўринлари яратишдан иборат.

Жорий йилнинг ўтган даврида кичик бизнес субъектлари учун шаҳардаги тижорат банклари томонидан 53 миллиард сўмдан ортиқ, яъни белгиланган режадан икки баравар кўп кредит ажратилгани ҳам соҳа ривожига қаратилаётган эътиборнинг яна бир тасдиғидир. Бу борада олиб борилган саъй-ҳаракатлар натижасида 2 мингга яқин янги иш ўрни яратилди. Аҳамиятлиси, меҳнат шартномасини имзолаганларнинг 600 дан зиёди касб-ҳунар коллежи битирувчиларидир.

– Мамлакатимизда хотин-қизларнинг жамиятдаги мавқеини юксалтириш, ҳуқуқ ва манфаатларини ҳимоялаш, бандлигини таъминлашга алоҳида эътибор қаратилмоқда, – дейди “Зулфия бону чевар” хусусий корхонаси раҳбари Ўғилой Мирзажонова. – Мен ҳам мана шу имкониятлардан оқилона фойдаланишга ҳаракат қилмоқдаман. 2007 йил 2 касаначи билан кўрпа-тўшак тикиб, ички бозорга чиқарган эдик. Ишимизни ривожлантириб, ўтган йили ҳудуддаги қаровсиз бинолардан бирини “ноль” қийматда олдик. 300 миллион сўм миқдорида инвестиция йўналтирилди. Бунда 52 миллион сўм миқдорида тижорат банки кредит маблағидан фойдаландик. Натижада 15 янги иш ўрнига эга тикувчилик цехини ишга туширдик. Ҳозиргача 26 минг долларлик маҳсулот экспорт қилдик.

Бекобод шаҳрида рўйхатга олинган 972 тадбиркорлик субъектининг 800 га яқини кичик бизнес ва хусусий тадбиркорлик йўналишида фаолият олиб боради. Уларда шаҳардаги иш билан банд аҳолининг 60 фоизга яқини меҳнат қилаётгани алоҳида аҳамиятга молик.