Наманган вилояти Учқўрғон туманида Ўзбекистон мудофаасига кўмаклашувчи “Ватанпарвар” ташкилоти ташаббуси билан спортнинг картинг пойгаси тури бўйича Ўзбекистон очиқ чемпионатининг ҳал қилувчи босқичи ўтказилди.

Туман ўқув спорт-техника клубига қарашли картодромда муросасиз тарзда ўтган финал мусобақасида Наманган, Сирдарё, Тошкент, Бухоро ва Хоразм вилоятлари, пойтахтимиз ҳамда Россия Федерацияси, Қирғиз Республикасидан келган 85 нафар ўғил-қиз ўзаро баҳсларга киришди. 

Мустақиллигимизнинг ўттиз тўрт йиллигига бағишланган халқаро турнир шартларига кўра, спортчилар “Микро”, “Мини”, “Супер мини”, “Ок-жуниор, “Патриот”, “КФ” ва “КЗ” синфлари бўйича ғолиблик учун куч синашди. 

Мусобақанинг якуний натижаларига кўра, ёшлар ўртасида юқори натижаларга эришган Тошкент шаҳри жамоаси ғолибликни қўлга киритди. Наманганлик спортчилар иккинчи ўринга сазовор бўлди. Учинчи ўринга эса пойтахт вилояти вакиллари муносиб кўрилди. 

Катталар ўртасидаги рақобатда пойтахтлик пойгачиларига етадигани топилмади. Тошкент вилояти иккинчи, бухоролик картингчилар учинчи ўринларни қўлга киритди. 

Ғолиблар “Ватанпарвар” ташкилоти Наманган вилояти кенгаши томонидан диплом ва қимматбаҳо совғалар билан тақдирланди. 

Оқилхон Дадабоев, Ҳотам Мамадалиев (сурат), ЎзА.