АҚШ президенті Джо Байден Вашингтонның Финляндия мен Швецияның НАТО-ға қосылуын ратификациялайтын құжаттарға қол қойды.

«Бұл қадам Еуропа мен бүкіл әлемді қауіпсіз етеді. Одақтастарымызбен бірге біз көргіміз келетін болашақты қалыптастырамыз», - деген АҚШ президенті Ақ үйдің таратқан хабарында.

Байден НАТО-ның басқа елдерін Швеция мен Финляндияның мүшелігін мүмкіндігінше тезірек мақұлдауға шақырды.

Енді Скандинавия елдерінің мүшелігін толық ратификациялау үшін Солтүстік Атлантикалық альянсқа мүше барлық елдер ұлттық деңгейде тиісті құжаттарды бекітуі қажет.