Америка Қўшма Штатлари президентлигига Демократик партиядан номзоди қўйилган ва бўлиб ўтган сайловларда ишонарли ғалабага эришгани айтилаётган Жо Байден океан орти вақти билан шанба куни кечқурун Уилмингтоннинг Делавер шаҳридан туриб миллатга мурожаатини эълон қилади.

Бу дам шарқий ярим шар аллақачон 8 ноябрга ўтган, яъни Тошкентда куннинг биринчи ярми кечаётган бўлади. 

Маросим чоғида Байденнинг ёнида рафиқаси Жилл, вице-президентликка сайланган Камала Харрис ва унинг турмуш ўртоғи Дуглас Эмхофф бирга бўлишади. Бу ҳақда Байден штаби баёнот берган.

Шунингдек, ОАВда Байденнинг COVID-19 бўйича ишчи гуруҳ тузиш режаси ҳақида ҳам ёзишмоқда. Душанба куни эълон қилиниши кутилаётган коронавирус тарқалишига қарши курашувчи мазкур гуруҳ таркиби 12 аъзодан иборат бўалди, дея хабар берган “Axios” портали.

Нашр ёзишича, гуруҳни 3 мутахассис бошқаради: АҚШнинг собиқ бош жарроҳи Вивек Мёрти, собиқ Санитария ва озиқ-овқат маҳсулотлари ҳамда тиббий дори воситалари сифати назорати бошқармаси (FDA) бошлиғи Девид Кесслер ва Ел университети ходими доктор Марселла Нунес.

Қайд этилишича, COVID-19 га қарши кураш бўйича ишчи гуруҳ аъзолари номини эълон қилиш орқали Байден ўтиш даврида ўзининг биринчи навбатдаги вазифаси сифатида пандемия тарқалишига қарши туриш эканини намойиш қилиш ниятида.

Дарвоқе, АҚШнинг амалдаги президенти Доналд Трамп ҳам эпидемиянинг бошидаёқ, яъни жорий йил январь ойи охирида коронавирусга қарши кураш бўйича ишчи гуруҳ тузганди. Гуруҳга бир қатор вазирлик, идоралар раҳбарлари киритилганди.