АҚШ Президенти Жо Байден бўлажак G20 саммитида Украина атрофида юзага келган вазиятни муҳокама қилишни режалаштираётганини ҳамда Россия Президенти Владимир Путин анжуманга келмаслигидан хабардор эканини таъкидлади.

"Мен G20 саммитига бораман, менга Президент Путин саммитда иштирок этмайди, дейишди, лекин бошқа дунё етакчилари бўлади ва биз навбатдаги қадамлар қандай бўлишини кўрамиз", – деди Байден Оқ уйда журналистлар билан бўлиб ўтган учрашувда.  

Чоршанба куни РФ Президентининг матбуот котиби Дмитрий Песков Владимир Путиннинг “Катта йигирматалик” саммитида иштирок этиши ҳақидаги саволга жавоб берар экан, Россиянинг G20 ва Осиё Тинч океани иқтисодий ҳамжамияти форумида иштирок этишининг турли формати кўриб чиқилаётгани, қарор яқин кунларда қабул қилинишини айтган эди.    

“Катта йигирматалик”нинг 17-саммити 15-16 ноябрь кунлари Бали оролида бўлиб ўтади.