АҚШ Президенти Жо Байден ва унинг рафиқаси Жилл Байден 17 сентябрь куни Қиролича Елизавета II ни сўнгги йўлга каузатиш маросимида иштирок этиш учун Буюк Британияга боради. Бу ҳақда Оқ уй матбуот хизмати хабар берди.

“Байден оиласи Қироличанинг дафн маросимида қатнашиш учун расмий таклифни қабул қилди”, дейилади баёнотда.
“CNN” Оқ уй манбасига таяниб аниқлик киритишича, маросимда иштирок этиш таклифи фақат Президент ва унинг рафиқасига тегишли. Демак, Байден Буюк Британияга расмий делегация таркибидаги ҳамроҳларсиз боради.

Таъкидланишича, “илгари амалдаги Президентга давлат раҳбарлари дафн маросимида расмийлар делегациясини олиб кетишга рухсат берилган эди”. Телеканал бунга мисол тариқасида Жанубий Африка Республикаси Президенти Нельсон Мандела билан видолашиш учун АҚШнинг 44-Президенти Барак Обама рафиқаси Мишель, шунингдек, бир қатор расмийлар ҳамроҳлигида ташриф буюрганини эслатган.