Президент Жо Байден америкалик фуқароларни вируснинг янги тўртинчи тўлқини кенг тарқалиб кетиш эҳтимолидан огоҳлантирди. Яна соғлиқни сақлаш соҳасидаги юқори мартабали мулозимлар ҳам эҳтиёт чоралари кўрилиши кераклигини айтяпти.

Мамлакатда эмлаш дастури бўйича катта қадамлар ташланди. Аммо АҚШда ўтган ҳафта кунига деярли 60 мингга яқин киши инфекция юқтириб олган, ўлим ҳолатлари кутилганидан анча кўп. Бу ҳақда касалликни назорат қилиш ва олдини олиш марказлари директори Рошель Валенски ахборот берди.

“Шошилинч чоралар кўрилмаса, АҚШ аҳолиси Европа давлатлари каби ўлимга дучор бўлиши ҳеч гап эмас”, – деди Валенски.

Статистикага кўра, мамлакатда бир кунда мингга яқин киши коронавирус туфайли вафот этяпти. Бир йилдан буён ушбу кўрсаткич ярим миллиондан ошди.

Байден губернаторлар, штатлар ва маҳаллий раҳбарларга ниқоб тақиш назоратини кучайтириш бўйича мурожаат билан чиқди.

Шунингдек, президент катта ёшдаги фуқароларнинг 90 фоизи 19 апрелга қадар вакцина қабул қилиш имкониятига эга бўлиши ҳақида эълон қилди.