Спортнинг қўл жанги тури кўпроқ эркакларга хос, деган тушунча бор. Аммо кейинги пайтда бу спорт тури билан шуғулланаётган хотин-қизлар сафи ҳам кенгайиб бормоқда. Энг муҳими, фақатгина сон эмас, ижобий натижалар ҳам сезиларли даражада ошмоқда.

Самарқанд шаҳар 2-спорт мактабида йўлга қўйилган қўл жанги секцияси машғулотларида доимий иштирок этаётган 60 нафар ёшнинг 20 нафари қизлар ҳисобланади. Бу ерда мураббий Наргиза Нарзиқулова спортчи сифатида ҳам, тренер сифатида ҳам самарали фаолият олиб бормоқда. 

– Ўн ёшлигимдан маҳаллада ташкил қилинган спорт тўгарагига борганман, - дейди Наргиза Нарзиқулова. – Бошида бу спорт тури қизларга хос эмас, деганлар кўп бўлганди. Аммо илк машғулотлардаёқ қўл жангига ҳавасим ортганди. Ва ҳеч қандай қаршилик мени мақсадимдан қайтаролмади. Бугун ушбу қароримдан ўзим ҳам, яқинларим ҳам хурсанд.

[gallery-16301]

Наргиза спортчилик фаолияти давомида 2020 йил Беларусь Республикасининг Минск шаҳрида ўтказилган жаҳон кубоги ва Европа чемпионатида иккинчи ўринни қўлга киритган. 2021 йилда Тошкент шаҳри мезбонлик қилган жаҳон чемпионатида ҳам иккинчи ўринни эгаллаган. Мана олти йилдирки, у ўзи каби спортга иштиёқманд ёшларга қўл жанги сирларини ўргатиб келмоқда. Эндиликда унинг шогирдлари ҳам халқаро майдонларда муносиб иштирок этмоқда. Айни пайтда Наргиза шогирдлари билан Қозоғистоннинг Алмати шаҳрида ёшлар ўртасида ўтказиладиган Осиё чемпионати баҳсларига тайёргарлик кўрмоқда.

– Спортчи учун ҳам оила биринчи ўринда, – дейди Наргиза. – Менинг бахтим спортчилар оиласига келин бўлганим. Турмуш ўртоғим ҳам спортчи. Ҳозир қўл жанги бўйича мураббийлик фаолиятини юритмоқда. Спортда бахтимни топдим. Спорт –менинг ҳаётим.

<iframe width="650" height="420" src="https://www.youtube.com/embed/jAH2hc8KAVk" title="Baxtini sportda topdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Ғ.Ҳасанов, А.Исроилов (видео), ЎзА мухбирлари