Бугун дунё бозорида қишлоқ хўжалиги маҳсулотининг ҳажмидан кўра унинг хавфсизлиги, табиийлиги ва шаффоф ишлаб чиқариш занжири устувор аҳамият касб этмоқда. Ана шу талаблар фонида Жиззах вилоятининг Бахмал туманида етиштирилаётган заъфарон маҳсулоти халқаро ишончни яна бир бор мустаҳкамлади.
Бахмал туманида фаолият юритаётган “BMB-Opera Zafferano” корхонаси АҚШ Қишлоқ хўжалиги вазирлигининг Миллий органик дастури — USDA Organic (USDA NOP) халқаро сертификати муддатини узайтирди. Мазкур сертификат Нидерландияда жойлашган “Control Union Certifications B.V.” томонидан берилган бўлиб, у корхонада заъфаронни етиштириш, сақлаш ва қайта ишлаш жараёнлари қатъий халқаро органик стандартларга тўлиқ мувофиқ эканини тасдиқлайди.
USDA Organic сертификати — бу шунчаки ҳужжат эмас. У маҳсулот таркибида кимёвий ўғитлар, синтетик пестицидлар ва тақиқланган моддалар қўлланилмаганини, ишлаб чиқариш жараёни эса доимий назорат остида амалга оширилганини кафолатлайди. Айни шу жиҳат озиқ-овқат хавфсизлигини таъминлашда ҳал қилувчи аҳамиятга эга.
Мутахассислар таъкидлашича, органик маҳсулот ишлаб чиқариш нафақат экспорт салоҳиятини оширади, балки аҳоли саломатлигини муҳофаза қилиш, ер ва сув ресурсларидан оқилона фойдаланишда ҳам муҳим омил ҳисобланади. Бу маънода, Бахмал туманида органик заъфарон етиштириш тажрибаси ҳудудий қишлоқ хўжалигида барқарор ривожланишга хизмат қилмоқда.
Сертификатнинг узайтирилиши корхонага ўз маҳсулотини АҚШ ва бошқа халқаро бозорларга “organic” белгиси остида экспорт қилиш имкониятини беради. Шунингдек, сертификатга оид маълумотлар “USDA Organic Integrity Database” расмий электрон платформасида акс этгани корхона фаолиятининг очиқлиги ва ишончлилигини янада оширмоқда.
Муҳими, ушбу ютуқ якка корхона доирасида қолиб кетмаяпти. У Жиззах вилоятида етиштирилаётган қишлоқ хўжалиги маҳсулотларининг халқаро бозордаги рақобатбардошлигини кучайтириш, ҳудуднинг органик қишлоқ хўжалиги харитасидаги ўрнини мустаҳкамлашга хизмат қилмоқда. Айниқса, озиқ-овқат хавфсизлиги глобал кун тартибига чиққан бугунги шароитда бундай ташаббуслар стратегик аҳамият касб этади.
Шу тариқа, Бахмал заъфарони нафақат ўзининг ноёб таъми ва шифобахш хусусиятлари, балки халқаро органик ишонч билан ҳам Ўзбекистон қишлоқ хўжалигининг янги салоҳиятини намоён этмоқда.
Абдужалол Қаюмов, ЎзА мухбири