Мамлакатимизга амалий ташриф билан келган Мўғулистон ташқи ишлар вазири ўринбосари Батсумбер Мунхжин ташқи ишлар вазирлигида бўлиб ўтган учрашувдан сўнг журналистларга интервью берди.

— Аввало, шундай гўзал юртда эканлигимдан, анъанавий ва ўзига хос меҳмондўстлик изҳор этилаётганидан беҳад мамнунлигимни изҳор қилмоқчи эдим, — дейди Мунхжин жаноблари. — Ташрифдан кўзлаган мақсадимиз ўзаро муносабатни, асосан, иқтисодий алоқалар ва савдо-сотиқни ривожлантиришдир. Қувонарлиси, бунинг учун ҳар икки томонда имконият етарли. Тошкентда Ўзбекистон ва Мўғулистон ишбилармон доиралари вакилларининг кенг доирадаги учрашуви бўлиб ўтди. Тадбиркорларимиз бир-бири билан ҳамкорлик ўрнатиш учун кучли қизиқиш билдиргани, катта иштиёқ билан мулоқотга киришганини кузатиш жуда ажойиб. Мен шу пайтгача ҳеч қачон тадбирларда бундай завқ билан иштирок этмаган эдим.

Савдо-иқтисодий алоқада мамлакатингиз, айниқса, мева-сабзавот экспорти борасида улкан салоҳиятга эга. Биз эса, асосан, гўшт етказиб берувчи давлатмиз ва Мўғулистондан Ўзбекистонга гўшт маҳсулотлари олиб киришга маҳаллий корхоналар томонидан жиддий қизиқиш билдирилмоқда.

Давлатларимиз ўртасида дипломатик муносабат ўрнатилганига 30 йил бўлди. Ишончим комилки, кейинги 30 йил давомида ҳамкорлигимиз мисли кўрилмаган даражада кенгаяди.

Ўзбекистондаги ислоҳотларни кўриб, тўғриси, ҳайратга тушдим. Хусусан, иқтисодий соҳада рўй бераётган ижобий ўзгаришлар давлат раҳбари ва ҳукумат амалга ошираётган улкан ислоҳотлардан дарак беради.

Энди Мўғулистон ва Ўзбекистон фуқаролари ҳар икки томонга визасиз кириши мумкин. Бундай оқилона қарор, айниқса, давлатларимиз бизнес ва туризм соҳалари ривожига беқиёс ҳисса қўшади.

Улуғбек МАҲМИРЗАЕВ ёзиб олди.

ЎзА