Давлатимиз раҳбарининг ташаббуси билан жорий этилаётган “Тадбиркорларнинг барқарорлик рейтинги”да ундаги баҳоловчи барча мезонларга мос келадиган тадбиркорлик субъектларига субсидиялар, имтиёзлар ва преференциялар бериш назарда тутилган.

Наманганда вилоят солиқ бошқармасининг ишчи гуруҳи томонидан кичик бизнес вакилларига “Тадбиркорларнинг барқарорлик рейтинги”дан кўзланган мақсад-вазифаларни тушунтириш ҳамда тарғибот ишлари давом этмоқда. Жумладан, Давлатобод туманидаги “Fazman textile” масъулияти чекланган жамият раҳбари ҳамда бош ҳисобчиси билан мулоқот ўтказилиб, барқарорлик рейтинги борасида тушунтириш олиб борилди. Рейтингнинг электрон платформаси қай тартибда ишлаши ва тадбиркорлар қандай мезонлар бўйича баҳоланишига оид батафсил маълумот берилди.  

Таъкидлаб ўтилганидек, рейтингнинг  баҳолаш  мезонлари 23 та бўлиб, улар учта гуруҳга бўлинган ҳамда ушбу мезонлар фақат юридик шахсларга нисбатан татбиқ этилади. Ўз навбатида, жамият раҳбари Тоҳиржон Жўраев рейтинг юритиш борасида ўз таклифларини билдирди. Маълумот ўрнида, “Fazman textile” МЧЖга қарашли текстиль цехларида эркаклар ва болалар устки кийимлари Германиянинг дунёга машҳур савдо брендлари остида ишлаб чиқарилади.  

Айни вақтда 500 киши меҳнат қилаётган мазкур корхонада ўтган 2023 йилда экспорт ҳажми 4 миллион 750 минг АҚШ долларини ташкил этди. “Grand mens wear” ҳамда “Grand mens poyabzallari” масъулияти чекланган жамият таъсисчилари ва ҳисобчилари билан кечган мулоқотда ҳам “Тадбиркорларнинг барқарорлик рейтинги” шаффофликни таъминлашга хизмат қилиши, солиқ юки бўлмаслиги, қолаверса, фаолият рейтингига ҳам ижобий таъсир кўрсатиши таъкидланди.  

Учрашувда баҳолаш мезонлари билан боғлиқ саволларга батафсил жавоб қайтарилди. Шунинг баробарида, рейтинг мезонлари юзасидан ишбилармонларнинг фикр-мулоҳазалари ва таклифларини аниқлаш мақсадида сўровнома ҳам ўтказилди. Мулоқотларда қайд этилганидек, барқарорлик рейтинги “юқори” бўлган мулкчилик субъектлари учун маълум имтиёзлар, субсидиялар ва преференциялар тақдим этилади.  

Масалан, барча солиқ текширувларидан озод қилиш, ҚҚС 24 соат ичида, бошқа солиқлар бўйича ортиқча тўловлар эса уч кун муддат ичида қайтарилади. Шунингдек, рағбатлантириш чоралари устав капиталида давлат улуши 50 фоиз ва ундан кўп бўлган давлат корхоналари ҳамда юридик шахсларга нисбатан қўлланилмайди.  

Вилоятдаги солиқ органлари томонидан тадбиркорлик субъектларига янги ишлаб чиқилган рейтинг ҳамда унда юқори кўрсатгичга эришиш мезонларини тарғиб этишга қаратилган тадбирлар давом этмоқда.  

Оқилхон Дадабоев, ЎзА мухбири