Bugungi kunda Toshkent viloyatida aholi bandligini ta’minlash, ayniqsa, yoshlar va mehnat migratsiyasidan qaytgan fuqarolarni ijtimoiy qo‘llab-quvvatlash davlat siyosatining ustuvor yo‘nalishiga aylandi. 2025 yilga kelib viloyatda "mahallabay" ishlash tizimi yangi sifat bosqichiga ko‘tarildi va har bir ishsiz fuqaro bilan individual ishlash mexanizmi yo‘lga qo‘yildi.

Toshkent viloyatida 2025 yil davomida "Yoshlar balansi" asosida olib borilgan xatlovlar natijasida ishsizlikni kamaytirish va migratsiya oqimini tartibga solish bo‘yicha samarali tizim yaratildi. Viloyat hokimligi, Yoshlar ishlari agentligi va boshqa mutasaddi tashkilotlar hamkorligida amalga oshirilayotgan loyihalar doirasida minglab yigit-qizlarning hayotida ijobiy o‘zgarishlar yuz bermoqda.

Joriy yilda "Yoshlar daftari" orqali ko‘rsatilayotgan yordam turlari soni sezilarli darajada kengayib, ularning nafaqat bandligini ta’minlash, balki tadbirkorlik tashabbuslarini moliyaviy qo‘llab-quvvatlashga asosiy urg‘u berildi. Xususan, tadbirkorlik boshlamoqchi bo‘lgan yoshlarga 100 million so‘mgacha imtiyozli kreditlar ajratilishi, shuningdek, zamonaviy kasblarni egallash istagidagi yoshlarning o‘qish xarajatlari uchun 50 foizlik subsidiyalar berilishi tizimning nechog‘lik hayotiyligini ko‘rsatmoqda.

Tumanlar kesimida olib qaralganda, Angren shahridagi yirik sanoat korxonalari migratsiyadan qaytgan yoshlar uchun asosiy ish beruvchiga aylangan bo‘lsa, Zangiota va Parkent tumanlarida qishloq xo‘jaligi hamda agro-turizm sohasida yangi ish o‘rinlari yaratilmoqda. Parkentda 100 gektardan ortiq yer maydonlarining yoshlarga ijaraga berilishi natijasida yuzlab oilalar doimiy daromad manbaiga ega bo‘ldi. Chinoz tumanida esa servis va baliqchilik tarmoqlarida yoshlar uchun alohida loyihalar ishga tushirilib, mahalliy eksport salohiyati oshirilmoqda.

Migratsiya masalasida ham tizimli yondashuv joriy etilgan bo‘lib, xorijga ketayotgan fuqarolar uchun kasbiy va til o‘rgatish kurslari tashkil etilmoqda. Mehnat migratsiyasidan qaytgan fuqarolarning reintegratsiyasi, ya’ni ularning vatanimizda o‘z o‘rnini topishi uchun "Xavfsiz migratsiya" dasturi doirasida huquqiy va moliyaviy ko‘mak berilmoqda. Masalan, xorijda tajriba orttirib qaytgan fuqarolarga o‘z biznesini yo‘lga qo‘yish uchun asbob-uskunalar subsidiya asosida yetkazib berilyapti.

Xulosa o‘rnida aytish mumkinki, Toshkent viloyatida amalga oshirilayotgan bu kabi islohotlar "Inson qadri uchun" tamoyilining amaldagi ifodasidir. Mahallalardagi yoshlar yetakchilari va hokim yordamchilari tomonidan ko‘rsatilayotgan manzilli yordamlar ishsizlik darajasini pasaytirish bilan birga, yosh avlodning kelajakka bo‘lgan ishonchini mustahkamlashga xizmat qilmoqda. 2025 yil yakuniga qadar viloyatda mehnat bozoriga kirib kelayotgan har bir yigit-qizni foydali mehnat bilan qamrab olish bo‘yicha qat’iy chora-tadbirlar davom ettiriladi.

Rustam Boboxo‘jayev,

Toshkent viloyati IIBB JXX JTSB

Muayyan yashash joyiga ega bo‘lmagan shaxslarni 

reabilitatsiyaqilish markazi boshlig‘i, mayor