Баҳрайн пойтахти Манама шаҳрида ўтаётган ёшлар ўртасидаги III Осиё ўйинларининг ортда қолган ўнинчи кунги мусобақалари Ўзбекистон спорт делегацияси учун муваффақиятли якунланди.

Янги Ўзбекистоннинг оловқалб спортчилари велоспорт, оғир атлетика, аёллар кураши, бокс каби йўналишларда катта муваффақиятга эришди.

Велоспортнинг 75 километр масофада кечган гуруҳ пойгасида терма жамоамиз аъзоси Гулҳаё Сатторова 47 нафар иштирокчи орасида марра чизиғини 1:59:26 сонияда босиб ўтиб, олтин медални қўлга киритди.

Шунингдек, оғир атлетикачи қизимиз Маржона Абдумуталова -58 килограмм вазн тоифасида даст ва силтаб кўтариш баҳслари ҳамда икки кураш натижасига кўра, 102, 108 ҳамда 111 килограммли тошларни бўйсундириб, Осиё ўйинлари ғолибига айланиш билан бирга, қитъа рекордини ўрнатди. Унинг ўзига хос ғалабаси Осиё оғир атлетика мухлислари қаторида мусобақаларни бевосита кузатиб бораётган Халқаро оғир атлетика федерацияси президенти Муҳаммад Жоолуд бошчилигидаги етук мутахассисларни ҳам лол қолдирди.

Эркин кураш мусобақаларининг аёллар йўналишида гиламга чиққан умидли спортчи қизимиз Мухлиса Машарипова -40 килограмм оғирликда барча рақибларини мағлуб этиш ортидан Осиёда курашчи қизларнинг янги авлоди камолга етаётганини намойиш этди.

Эътиборли жиҳати, Машарипова муросасиз беллашувларнинг саралаш баҳсларида муваффақиятга эришган бўлса, чорак ва ярим финалда Шимолий Корея ва Қирғизистон вакилини катта устунликда доғда қолдирди. Финалда эса япониялик рақибини 2:1 ҳисобида енгиб, мамлакатимиз курашчи қизлари орасида илк бор Осиё ўйинлари ғолибига айланди.

Қитъа ўйинларининг ўнинчи кунги баҳсларида икки нафар боксчимизнинг бронза медалларига эгалик қилиши ҳам нуфузли мусобақада Ўзбекистон спорт делегациясининг умумжамоа ҳисобидаги ўрни мустаҳкамланишига хизмат қилди.

Бугун, 29 октябрь куни Осиё ўйинларининг ўн биринчи мусобақалар кунида 11 та спорт турида беллашувлар ташкил этилса, мамлакатимиз спортчилари жиу-житсу, сузиш, велоспорт, дзюдо, волейбол, оғир атлетика, эркин кураш ва бокс йўналишларида ватанимиз шарафини ҳимоя қилади.

Учинчи бор ташкил этилаётган ёшлар ўртасидаги қитъа ўйинларида умумжамоада  48 та олтин, 35 та кумуш, 18 та бронза, умумий ҳисобда 101 та медалга эга Хитой етакчилик қилаётган бўлса, Ўзбекистон спорт делегацияси 19 та олтин, 5 та кумуш, 17 та бронза, жами 41 та медаллар шодаси билан 2-ўринда бормоқда. Кейинги ўринларни банд этган Таиланд (13-13-8), Қозоғистон (12-15-23), Эрон (12-11-21) жамоалари ҳамюртларимизни таъқиб этмоқда.

Эслатиб ўтамиз, қитъанинг 45 та мамлакати ёш спортчилари иштирокида ўтаётган III Осиё ёшлар ўйинлари 31 октябрга қадар давом этади.

Тўлқин Рўзиев,

ЎзА