Баҳор фасли келиши билан аксарият инсонлар аллергик касалликлардан азият чекади.

Бундай вазиятда қандай йўл тутиш кераклиги ва қайси мутахассисга мурожаат қилишни барчамиз ҳам билавермаймиз. Шунингдек, ушбу касалликдан буткул қутулиш мумкинми, деган савол кўпчиликка қизиқ.

Республика илмий-ихтисослаштирилган аллергология маркази раҳбари, тиббиёт фанлари доктори Илмира Розиқованинг сўзларига кўра, аллергияни аниқлашнинг бир нечта йўли бор.  

– Шифокор беморга аллергиянинг келиб чиқиши, қачон пайдо бўлиши, аллергия белгилари ҳақида саволлар беради, – дейди И.Розиқова. – Бундан ташқари, оиланинг бошқа аъзоларида аллергия борми, деб сўралади. Суҳбат давомида беморда аллергия бор-йўқлигини билиш мумкин. Бундан ташқари, уни аниқлаш учун қон таҳлили, терини тилиш сингари қатор тестлар мавжуд.  

Кўпчилик, аллергияни бутунлай йўқотишнинг имкони йўқ, деб ҳисоблайди. Аслида эса, шифокор тавсияларига тўлиқ амал қилган ва парҳезни канда қилмаганлар дарддан холос бўлиши мумкин экан.

– Aллергик касалликларни даволашда хасталикнинг бошланган вақтига эътибор беришимиз керак, – дейди И.Розиқова. – Бу жуда муҳим бўлиб, касаллик қанчалик тез ривожланиб борса, организм учун шунчалик хавфли ҳисобланади. Сурункали касаллик бўлгани учун аллергияни бутунлай организмдан йўқотиб юбориш анчагина мушкул. Касалликнинг олдини олиш учун соғлом турмуш тарзига амал қилиш керак. Яъни, мавсумий чанг аллергияси вақтида бошқа жойга вақтинча кўчиб ўтиш, агарда ҳар қандай гулга аллергиянгиз бўлса, уй ичи ва ташқарисидаги гуллар, ит ва мушук жунларига аллергиянгиз бўлса, улардан воз кечиш лозим.

Мутахассиснинг сўзларига кўра, афсуски, ҳозирда аллергияни тўлиқ дори-дармон билан даволашнинг имкони мавжуд эмас. Шу давргача ишлаб чиқарилган биринчи, иккинчи ва учинчи синфга мансуб бўлган антигистамин дорилар касалликнинг хуружи даврида фақатгина аллергиянинг белгиларини вақтинча, худди “тез ёрдам”дек, тўхтатади, аммо аллергияни буткул даволамайди.

М.Қосимова, ЎзА