Bagam orollari yaqinida Gaitidan suzib kelayotgan qayiq halokatga uchragan, natijada 16 nafar migrant halok bo‘lgan.

Reyter agentligining mahalliy hukumatga tayanib yozishicha, migrantlar  qayiqqa o‘tirib Gaitidan AQSHga qarab suzgan. Yakshanba kuni ertalab qayiq Nyu Providens oroliga 11 kilometr qolganda ag‘darilib ketgan. 

Migratsiya masalalari bo‘yicha vazir Kit Bellning ta’kidlashicha, halokat tufayli 16 kishi qurbon bo‘lgan,  21 kishi qutqarib qolingan. Yo‘lga chiqishdan oldin qayiqda jami qancha odam bo‘lgani hozircha noma’lum bo‘lib turibdi, deyiladi xabarda.