Доно халқимизда ёмон бўлди, деб куйинма, бир ёмоннинг ортидан яхши кунлар ҳам келади, деган доно мақол бор. Яратган Аллоҳ эса, сендан ҳаракат – мендан барокат, деган. Сабр-тоқат билан кутиб, яхши ният ва меҳр бериб меҳнат қилсак кўзлаган мақсадларимизга албатта етамиз.

Халқимизга хос бўлган бағрикенглик, меҳр-оқибат, бирдамлик ва ҳамжиҳатлик каби улуғ фазилатлар юрт бошига келган офатларни бартараф этиш, енгиб ўтиш ва тезда қайта оёққа туриш имконини берган. Сирдарё вилояти Сардоба, Оқолтин ва Мирзаобод туманларининг аҳолиси бошига тушган ташвишни оддий сўзлар билан, шунчаки, ифодалаш жуда қийин.

Тасаввур қилинг, киндик қонингиз томиб, ўсиб, улғайган, меҳнат қилиб, барпо этган бошпанангиз, яратган боғу роғ, мол-ҳолингиз, ишонган қўрғонингиз бир неча соатлар давомида тилсиз ёв томонидан йўқ қилинса...

Худога минг шукур, оқил, элпарвар, юртпарвар Юртбошимиз, меҳри чексиз, қалби осмон, саховати бир жаҳон халқимиз бор экан. Бунга Сирдарёга мамлакатимизнинг турли жойларидан жабр кўрган инсонларга амалий ёрдам бериш мақсадида кети узилмай келаётган инсонпарварлик ёрдамлари ёрқин мисол бўла олади.

Мен сирдарёликман. Сирдарёлик сенатор сифатида Тошкент шаҳрида куни кеча ўтказилган саховат ва кўмак акциясида бевосита қатнашдим. Шунга гувоҳ бўлдимки, пойтахт аҳли сирдарёлик ватандошлари учун чин дилдан ғамхўрлик кўрсатиб, 7 ёшдан 70 ёшгача юртдошларимиз имкон қадар, қўлларидан келгунича ёрдам қилишга ҳаракат қилаётгани, уларнинг олийжаноблигини кўриб, кўзларимдан беихтиёр ёш чиқди. Мен ҳам ана шундай меҳр-оқибатли, юртдоши бошига ташвиш тушганда бефарқ бўла олмайдиган халқнинг фарзанди эканлигимдан осмон қадар фахрландим.

Кимдир иссиқ кийим-кечак, кимдир кўрпа-тўшак, яна бошқаси озиқ-овқат, бирламчи эҳтиёж буюмлари, ҳаттоки, болалар ўйинчоқларидан иборат бўлган 28 та юк машинасига ортилган ёрдам Сирдарё вилоятига оқ фотиҳа бериб кузатиб қўйилди.

Хизмат сафаридан қайтган танишим, “Анвар ака, ишонасизми, умрим бино бўлиб, охири йўқ эшалонни кўрмаган эдим. Бугун кўрдим. Жиззах томонидан Қорақапоғистгону Сурхондарёдан, Тошкент вилояти томонидан Фарғона водийсию Тошкентдан Сирдарё томон ҳаракатланаётган юк машинасининг охирини топа олмадим”, дея тариф берди.

Ҳа, худди шундай, Президентимиз таъкидлаганларидек, бу ўлкада буюк халқ яшайди, буюк халқнинг меҳри, саховати ҳам буюк бўлади.

“Сардоба” сув омборидаги ўпирилиш натижасида тўғон яқинидаги 5 та қишлоқ катта талофат кўрди. Ана шу қишлоқлардан бири Мирзаобод туманидаги Янги ҳаёт маҳалласида мен туғилиб ўсганман. Биз оилада беш ака-укамиз. Мен Гулистон шаҳрида истиқомат қилсамда жигарларимнинг ҳаммаси бола-чақаси билан шу қишлоқда яшайди. Укам Лутфулло яқиндагина тўрт хонали уйни битказиб, чоғроққина, ака-ука, жигарлари учун ҳовли тўйи қилмоқчи бўлиб турганди. Афсуски, энди бу уйдан ном-нишон ҳам қолмади.

Отам раҳматли, келган бало мол-ҳолингга келсин, бошинг омон бўлсин, бош омон бўлса, тани-жонинг сиҳат бўлса, меҳнат қилиб топасан, қолганини Худо беради, дердилар. Одамларнинг жони омон қолгани бу Яратганнинг менинг сирдарёлик ҳамюртларимга кўрсатган инояти бўлса ажаб эмас.

Президентимизнинг тошқин бошланиши билан воқеа жойига етиб бориши, тошқин хавфи туғилган ҳудудлардан аҳолини зудлик билан эвакуация қилиниш ишлари улкан уюшқоқлик ва жуда катта тезлик билан юқори даражада, бор йўғи 1-1,5 соат давомида амалга оширилиши, катта йўқотиш – инсон ўлимидан асраб қолди. Бунда, аввало, аҳолининг ўзи ҳам бирдамлик намунасини кўрсатди.

Бевосита шу жараён иштирокчиси бўлган укамнинг айтишича, маҳаллий ҳокимликлар, фавқулодда вазиятлар, миллий гвардия, ички ишлар ходимларининг фаоллиги, халқимизнинг бир-бирига ёрдами сабаб хавфсиз ҳудудларга қочиб улгурилган.

Яхши ният билан тўй-томошага кияман, деб олиб қўйган кийим-кечагидан, пешона тери эвазига яратган экин-тикинию мол-ҳолидан, ишонган қўрғони уй-жойи, мол-мулкидан ажралиб саросимага тушиб қолган, эртанги кунидан ташвишланиб турган бир вақтида Давлатимиз раҳбарининг шундай пандемия деган бало туфайли карантин даврида, фалокат маркази етиб бориши, талафотни бартараф этиш ишларига ўзлари бош-қош бўлиб, тошқиндан жафо чекканларга, таҳликага тушмаслик, саросимага берилмаслик, уй-жойи бузулганларнинг уйини, экини зарар кўрганларнинг экинини, мол-ҳолини йўқотганларнинг молию, керак бўлса, уст-бошини ҳам қилиб беришларини, фақат бунинг учун бирлашиб, ҳамжиҳатлик билан меҳнат қилиш, сабр тоқат қилиш лозимлигини айтиб мурожаат қилганлари, фуқароларимизни чўкиб қолган кўнгилларини тоғдек, букчайиб қолган қадларини алифдек тик қилди, эртанги кунга, келажагига бўлган ишончларини юксалтирди.

Давлатимиз раҳбари, 2 кун давомида Сирдарёда қолиб, барча мутасадди вазирлик ва уларнинг қуйи тизим раҳбарларига тошқиндан жабр кўрган қишлоқларни аввало тозалаш, дезинфекция қилиш, кўчаларни тартибга келтириш, бузилиб кетган уйлар ўрнига янги, замонавий кўп қаватли уйлар қурилиши ҳамда янгидан инфратузилма обьектларининг барпо этилиши юзасидан аниқ топшириқ ва вазифалар берди. Бу эзгу амалларнинг барчаси ўз назоратларида бўлди.

Дарҳақиқат, офатдан жабр кўрган бирорта ҳам инсон кўчада ёки қаровсиз, эътиборсиз қолдирилмаяпти. Барчалари вақтинчалик турар-жой, иссиқ овқат ва зарур буюмлар билан таъминланмоқда. Сирдарё вилоятидаги тошқиндан хавфсиз бўлган туман шаҳарлардаги ўқув муассасаларининг ётоқхоналарига, мактабгача таълим муассасаларига ва энг қувонарлиси, фуқароларимиз эвакуация кўрганларни ўз хонадонларига жойлаштиришди. Жумладан, ўзимнинг Гулистондаги ҳовли жойимда ҳам 43 нафар жигарбандим паноҳ топди. Эвакуация қилинганларга нафақат эшикларини, қалбларини кенг очиб, сирдарёликлар бошига тушган ташвиш, бизнинг ҳам ташвишимиз, дея қабул қилган ватандошларимни меҳри дарёлигини кўриб шу халқнинг, шу элнинг, шу юртнинг фарзанди эканимдан қалбимдаги қувонч, фахр туйғуларини тарифлаб, тасвирлаб бера олмайман.

Мен, ўзбек эканимдан, ўзбекистонлик эканимдан, мана шундай бағрикенг, матонатли, бардошли ва чинакам инсонпарварлик туйғулари мужассам бўлган халқ вакили эканлигимдан, жасур, мард, одил Юртбошиси бор мамлакат фуқароси эканимдан ғурурланаман.

Тошқиндан жабр кўрган барча сирдарёликларга бугунги ташвишли кунларда сабр-тоқат тилаб, менинг ҳамюртларимга кўрсатилаётган беғараз инсонпарварлик ёрдамлари учун барча ўзбекистонликларга сирдарёлик бир фуқаро сифатида миннатдорлик билдираман. Яқин кунларда сув тошқинидан талофат кўрган сирдарёлик юртдошларимнинг ҳаёти яна ўз изга, ўз ўзанига тушиб кетади.