Біріккен Ұлттар Ұйымы Бас Ассамблеясы Нью-Йорк қаласында Өзбекстан Республикасының бастамасымен «Орман шаруашылығының тұрақты дамуы негізінде орман өсіру және ормандарды қалпына келтіру бойынша Іс-қимыл Декадасы» атты резолюцияны қабылдады.

Резолюцияның бірлескен авторлары ретінде әлемнің барлық аймақтарын қамтитын 80-нен астам мемлекет, оның ішінде Орталық Азия елдері, Әзербайжан, Ресей, Бразилия, Австрия, Германия, Финляндия, Португалия, Үндістан, Иран, Пәкістан, БАӘ, Қатар және Бахрейн елдері аталды.

Өзбекстан Сыртқы істер министрлігінің мәліметінше, бұл құжат Өзбекстан Президентінің негізгі бастамалары – «Қоршаған ортаны қорғау және жасыл экономика жылы» бағдарламасы, «Жасыл кеңістік» ұлттық жобасы және «Орталық Азия жасыл белдеуі» ағаш отырғызу акциясы негізінде әзірленген.

Резолюция 2027–2036 жылдарды Орман өсіру және ормандарды қалпына келтіру іс-қимыл онжылдығы деп жариялап, күш пен ресурстарды жұмылдыруға шақырады, сондай-ақ мемлекеттер мен ұйымдарға осы бағыттағы шараларды күшейтуді ұсынады.