«Куксарой» резиденциясында БҰҰ Бас хатшысы Антониу Гутерришті әлемде келісім мен ынтымақты белсенді түрде ілгерілету, ұйым қызметінің тиімділігін арттыру, сондай-ақ Өзбекстан мен БҰҰ арасындағы ынтымақтастықты нығайту жолындағы қызметі үшін Өзбекстанның ең жоғары мемлекеттік наградаларының бірі – «Жоғары дәрежелі Достық» орденімен марапаттау рәсімі өтті.

Мемлекет басшысы марапатты тапсыру кезінде Өзбекстан мен БҰҰ арасындағы ынтымақтастықтың қазіргі жоғары деңгейіне А.Гутерриштің қосқан жеке үлесін ерекше атап өтті.

Бас хатшы Өзбекстанда жүзеге асырылып жатқан жаһандық және өңірлік маңызы бар ауқымды реформалар мен бастамаларды, сондай-ақ БҰҰ институттарының республикадағы қызметін кеңейтуді толық қолдайтыны атап өтілді.

БҰҰ басшысының халықаралық қауіпсіздік пен тұрақтылықты нығайту, жаһандық басқару институттарын реформалау, Тұрақты даму мақсаттарына қол жеткізу, климаттың өзгеруімен күресу, «жасыл» және цифрлық даму, азық-түлік және энергетикалық қауіпсіздікті қамтамасыз ету жөніндегі ұзақ мерзімді күш-жігері атап өтілді.