Азия футбол конфедерациясы AFC Nations League (АФК Ұлттар лигасы) турнирін енгізу жоспарын жариялады.

Өзбекстан футбол қауымдастығының мәліметінше, жаңа турнир Азия елдері үшін халықаралық кездесулер жүйесін неғұрлым тәртіпті әрі тұрақты етуге бағытталған.

«Аталған турнир ФИФА күндері аясында ұлттық құрамалар үшін тұрақты әрі мазмұнды ойындар ұйымдастыруға мүмкіндік береді. Соның нәтижесінде қарсылас табудағы қиындықтар, логистикалық түйткілдер мен жоғары шығындар едәуір қысқарады.

АФК Ұлттар лигасы командалардың деңгейіне сай бәсекелі орта қалыптастырып, спорттық қағидаттарға негізделген тепе-теңдікті қамтамасыз етуді мақсат етеді. Сонымен қатар, бұл турнир ұлттық құрамалар үшін нақты даму бағытын және кезең-кезеңімен өсудің тұрақты жолын айқындайды», – делінген ӨФҚ хабарламасында.

Турнирдің форматы, іске асыру кезеңдері мен нақты мерзімдері АФК комитеттеріндегі талқылаулардан кейін ресми түрде жарияланатыны айтылған.