Азия даму банкі (АДБ) Өзбекстанда жалпы орта білім беруде ғылым, технология, инженерия және математика (STEM) сапасын арттыруға бағытталған жобаға 100 млн доллар көлемінде жеңілдетілген несие бөлуді мақұлдады.

Жоба аясында 200 мектеп заманауи ресурстық орталықтарға айналдырылып, мұғалімдер даярланбақ және қыз балалардың STEM салаларына қызығушылығын арттыру көзделген.

«Жалпы орта білімде STEM» деп аталатын бұл бастама жастарды инновацияға негізделген заманауи дағдылармен қамтамасыз ету арқылы Өзбекстанның 2030 жылға дейін жоғары орта табысты елге айналу мақсатына үлес қосады. 

АДБ-ның Өзбекстандағы өкілдігі директоры Канокпан Лао-Арайаның айтуынша, «бұл бастама – адам капиталына инвестиция мен жастарды қолдауға деген берік ұстанымды білдіреді, әрі инклюзивті және бәсекеге қабілетті болашақтың іргетасын қалайды».

Жоба шеңберінде ел бойынша 200 мектептің оқу ортасы жаңартылып, басқа оқу орындары үшін ресурстық базаға айналады. Жаңартулар құрамына заманауи зертханалар, АКТ инфрақұрылымы, күн энергиясы жүйелері және мүмкіндігі шектеулі оқушылар үшін инклюзивті жағдайлар орын алған.

Бастама ел көлемінде алты STEM пәні бойынша мұғалімдерді қайта даярлауды, оқу технологиялары негізінде STEM білімін дамытуға жағдай жасауды қамтиды. Сондай-ақ қыз балалардың бұл бағыттарға қызығушылығын арттыру үшін арнайы ақпараттық науқандар мен кәсіби кеңес беру бағдарламалары жүзеге асырылады.

Жоба Өзбекстанның 2022–2026 жылдарға арналған Даму стратегиясына және АДБ-ның «Стратегия 2030» басым бағыттарына — цифрлық трансформация, гендерлік теңдік және климаттық тұрақтылыққа толық сәйкес келеді. Сонымен қатар ол АДБ-ның адам капиталына бағытталған кең ауқымды бастамаларын, соның ішінде «жасыл экономика» үшін кәсіби білімге салынатын инвестицияларды толықтырады.

Биыл АДБ мен Өзбекстан ынтымақтастығының 30 жылдығы атап өтілуде. 1995 жылдан бері банк елге мемлекеттік сектор жобалары үшін несиелер, гранттар мен техникалық көмек түрінде жалпы 14,6 млрд доллар қаржы бөлген.