Азим Суюн таваллудига 75 йил тўлди

Ўтган асрнинг 70-йиллари ўрталарида адабиётимизга гулдурос овоз билан кириб келган шоир Азим Суюн ўзбек шеъриятини халқ оҳанглари, табиатнинг нафис тасвири, янгича шакл ва мазмун билан бойитди. Шоирнинг дунё юзини кўрган йигирмадан ортиқ шеърий китоблари, публицистик асарларида бир руҳ устувор бўлиб қолди. Бу руҳ асрлар дарёсида пишиб етилган, халқона донишмандликнинг гўзал намуналари бўлган, илдиздан япроққача миллий мағизга тўқ шеърий асарлар бўлиб, китобхонлар қалбига кўчди.  

Яқинда Ўзбекистон Ёзувчилар уюшмасида “Хиёбон оқшомлари” лойиҳасининг навбатдаги тадбири бўлиб ўтди. Мазкур шеърият оқшоми атоқли шоир, Ўзбекистонда хизмат кўрсатган маданият ходими Азим Суюн ижодига бағишланди. 

Йиғилишда сўз олганлар марҳум шоирнинг ижод йўли, шеърларидаги асл моҳият, тадқиқот қилиниши керак бўлган асарлари хусусида тўхталиб, у яратган ижодий ишлар бугунги кунда ёшлар орасида тобора оммалашаётгани ҳақида маъруза қилдилар.  

–Азим Суюн адабиёт майдонига Мурод Муҳаммад Дўст, Хайриддин Султонов, Хуршид Даврон, Эркин Аъзам, Шавкат Раҳмон сингари забардаст  ижодкорлар билан биргаликда кириб келди, – деди тадқиқотчи олима Наима Келдиёрова. – Унинг илк шеърий тўплами “Менинг осмоним” номи билан  1978 йилда нашр этилган. Азим Суюн шоирликни халқ дардини айтишда, миллат дардига дармон бўлишда, деб билар эди. Фикрларини содда, жайдари тилда ифода этиш шоир ижодининг ўзига хослигидир. А.Суюн халқона, бахшиёна анъаналарни давом эттирган ижодкор эди. Айни пайтда тарих, миллий ўзликни англаш унинг шеъриятида устувор ўрин эгаллайди.  

Дарҳақиқат, шоирнинг яқинлари айтганидек, Азим Суюн кўнгил овчиси, табиат ва муҳаббат шоири эди. У заминни, инсониятни бир бутун ҳолатда кўрди. Замин тақдирини ўзининг тақдири деб билди. Шунинг учун ҳам шоирнинг шеър ва достонларини ўқиганингизда кўнглингизга анчайин яқин бўлиб қолган бир овозни пайқайсиз.  

Тадбир давомида шоир шеърларидан намуналар ўқилди. Ўзбекистон давлат санъат ва маданият институти талабаси Сарвар Усмонов Азим Суюн сўзи билан айтилувчи қўшиқларни ижро этди.    

<iframe width="640" height="360" src="https://www.youtube.com/embed/qbDg-4LPZ-8" title="Азим Суюн англатган ўзлик" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Ўткир Алимов,  

Дониёр Ёқубов (видео), ЎзА