Давлат раҳбарининг “Иккинчи жаҳон уруши қатнашчиларини рағбатлантириш тўғрисида”ги фармони халқимизга хос олижаноблик ва меҳр-оқибатнинг ёрқин ифодаси бўлди.

Фашизм устидан қозонилган тарихий ғалабага 75 йил тўлмоқда. Бу катта давр. Албатта, ҳаётнинг ўз қонунлари бор. Урушдан сўнг 30 мингдан зиёдроқ бухоролик она юртига қайтиб келган эди. Бугунги кунда уларнинг сафи саноқли, атиги 33 нафари ҳаёт. Шулардан 29 нафари эркак ва 4 нафари аёллардир.

Олия Ахмедова Бухоро шаҳрида умргузаронлик қилаётган Иккинчи жахон уруши қатнашчиларидан бири.

– Бугунги дориломон кунларга эсон-омон етиб келишнинг ўзи катта бахт, — дейди Бухоро шаҳар, Нақшбанд кўчаси 306 уй 2 хонадонда яшовчи, Олия буви. — Бундай тинч ва фаровон турмушни, юртимиз озодлиги ва ободлигини кўриш кўплаб қуролдошларга насиб этмади. Яратганга беҳисоб шукр, эл-юрт ардоғида шундай табаррук ёшга етиш бахти насиб қилди.

Олия Ахмедова 1924 йилда туғилган. Болалик йиллари Иккинчи жаҳон уруши даврига тўғри келган Олия Ахмедова ўша замоннинг қийинчиликлари, очарчиликларни эслайди. Уруш даврида ҳарбий тиббий госпиталга жангоҳлардаги ярадорларга тиббий хизмат кўрсатганлиги ҳақида гапириб берди ва ёшларга насиҳат бериб илоҳим, дунёда тинчлик барқарор бўлсин, юртимизга кўз тегмасин, халқимизнинг ризқи бутун бўлсин деб дуо қилди. Кўзига ёш олиб дориломон кунларга етганига шукур қилади.

Бугунги дунёда бўлаётган нохуш ҳолатларни ойнаи жаҳон орқали кўриб, ўз фикрини билдирар экан, давлат раҳбарининг куюнчаклик билан қилаётган мурожаатларига эътиборсиз бўлмасликни айтди. Бошимиздан синовли кунлар ўтишига қарамай Давлат раҳбарининг уруш қатнашчилари ва ногиронларини моддий рағбатлантириш тўғрисидаги қабул қилинган фармонларини ўқиб янада руҳланганлигини таъкидлайди. 

Дарҳақиқат, умрининг энг азиз йилларини, ёшлик шижоатини даҳшатли урушда қурбон қилган аждодларимизни ҳар қанча ардоқласак шунча оз. Улар жасорати қалбимизда мангу яшайди.