Қазақстан астанасы Нұр-Сұлтан қаласының орталығында орналасқан Қазақ елінің Мемлекеттік туы Алматы маңында ұшақ апатынан қаза болғандарды аза тұту күніне орай төмен түсірілді, деп хабарлайды ҚазАқпарат.

Қазақстанның ең үлкен туы елорда орталығында «Атамекен» этно-мемориалдық кешені аумағында орнатылған. Оның ресми ашылуы он жыл бұрын елорда күнін мерекелеу аясында өтті. Тудың көлемі – 450 шаршы метр, ал салмағы 100 килограмм тартады. Ені 15, ұзындығы 30 метрлік елдің бас туы жай күндері 111 метр биіктікке көтеріледі. 1991 жылдан бастап Тәуелсіздік алғаннан бері Қазақстан тарихында ұлттық аза тұту күні сегіз рет жарияланды.

Еске сала кетсек, 27 желтоқсанда Алматыдан Нұр-Сұлтанға бағыт алған Bek Air әуе компаниясының ұшағы апатқа ұшыраған болатын. Осы оқиғаға байланысты ҚР Президенті Қасым-Жомарт Тоқаев 2019 жылдың 28 желтоқсанын жалпыұлттық аза тұту күні деп жариялаған.

Осы оқиғаға байланысты ҚР Президенті шұғыл кеңес шақырып, онда Үкіметке Алматы қаласы мен Алматы облысы әкімдіктерімен бірлесіп қаза болған азаматтардың отбасына 4 миллион теңге көлемінде материалдық көмек көрсетуді және қайтыс болғандардың жақындарына жан-жақты психологиялық және медициналық қолдау көрсетуді тапсырған.

Ал, қазір Вek Air авиакомпаниясына тиесілі болған ұшақтардың пайдаланылуы ұшу қауіпсіздігі бойынша барлық мәселе толық шешілгенге дейін тоқтатылған.