Президент Шавкат Мирзиёев Кўксарой қароргоҳида бўлиб ўтган ёшлар билан мулоқот доирасида “Рақамли технологиялар йўналишида энг яхши стартап” – “President Tech Award” лойиҳаси ғолибларининг тақдимоти билан танишди.

Мазкур танлов Дастурий маҳсулотлар ва ахборот технологиялари технологик парки дирекцияси томонидан Рақамли технологиялар вазирлиги кўмагида 2023 йилдан бошлаб ўтказиб келинмоқда. Унинг умумий мукофот жамғармаси 1 миллион долларни ташкил этади.

Назифа Абилова, “Рақамли технологиялар йўналишида энг яхши стартап” (President Tech Award) танлови биринчи ўрин соҳибаси: 

– Аёллар репродуктив саломатлигига бағишланган “Femmy” рақамли платформаси асосчиларидан бириман, – деди Н.Абилова. – Аёллар кўпинча соғлиғи бўйича оддий, лекин муҳим саволларга ишончли  жавоб топишда қийналади. Авваллари ўзим ҳам соғлиғимга оид саволларимга  жавоб топишда қийналганман. Шу муаммони ҳал қилиш мақсадида биз “Femmy” платформасини яратдик. 

Бугунги кунда 20 000 дан ортиқ аёл платформадан фойдаланмоқда, фойдаланувчиларнинг 70 фоизи ҳудудларда яшайди.

Femmy аёлларга тиббий маълумот бериш билан бирга, ўзини соғлиқ трекерига ҳам эга. Ушбу трекер орқали аёлларда бўладиган турли хил даврлар ёки соғлиқ кўрсаткичларини кузатиб бориши мумкин. Бу эса эрта муаммоларни аниқлаш ва шифокорга ўз вақтида мурожаат қилишга ёрдам беради. 

Аввало, юртимиздаги соғлиқни сақлаш ва рақамли инновацияларга берилаётган эътибордан миннатдормиз ва муносиб ҳисса қўшишга тайёрмиз. Келгусида ижтимоий ҳимояга муҳтож аёллар учун бепул телемедицина хизматларини йўлга қўйишни ҳам режалаштириб қўйдик.

Биз Femmy платформасини давлат поликлиникалари ва бошқа тиббий муассасалар билан боғлаб тарғибот қилишни режалаштирганмиз. Бу орқали кўпроқ аёллар Femmy ҳақида хабар топади, тиббий саводхонлиги ошади.

 Натижада давлат тиббиёти самарадорлиги ортади ва замонавий рақамли ечимлардан кенг фойдаланиш имконияти яратилади.

Давлатимиз раҳбарига Femmy платформасини давлат поликлиникалари ва бошқа тиббий муассасалар билан боғлашнинг самараси ҳақида тақдимот қилдим.

<iframe width="650" height="420" src="https://www.youtube.com/embed/W1f2ayfyAUw" title="“Ayollar reproduktiv salomatligi uchun platforma yaratdik”" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

ЎзА мухбири Абдулазиз РУСТАМОВ ёзиб олди