Аёллар олий лигаси ҳам ёзги таътилни тамомлаб, иккинчи даврани 12-туридан давом эттиришди. Кеча ўтказилган беш ўйиндан фақат биттасида меҳмонларнинг ғалабаси кузатилди – «қалдирғочлар» пойтахт дербисида «шерлар»нинг «курагини ерга теккизишди».

Бу ғалаба билан турнир жадвали пешқадами «Сўғдиёна»дан атиги икки очко ортда қолмоқда. Мамлакатнинг кўпкарра чемпиони «Севинч» эса бу мавсумда бош совринга даъвогарлар сафидан узоқлашмоқда. Қаршиликлар «Сўғдиёна» меҳмони бўлишди ва ўз дарвозаларидан жавобсиз иккита гол ўтказиб юборишди. Жиззахликларнинг иккинчи тўпига ўйиннинг сўнгги дақиқаларида жамоанинг янги вакиласи Махлиё Сариқова муаллифлик қилди. Махлиё аслида «Севинч» жамоасида тажриба орттирган, юлдуз бўлиб порлаган, бир неча йил давомида жамоанинг сардори бўлиб ҳаракат қилган эди. Бугун эса «Сўғдиёна» таркибида собиқ жамоасини «жазолашга» ҳисса қўшди. Мазкур мағлубиятдан сўнг «Севинч» «Сўғдиёна»дан тўққиз, «Бунёдкор»дан эса етти очкога фарқ қиляпти. АГМК ўз майдонида «Металлург»дан, «Локомотив» эса «Навбаҳор»дан устун келди. Битта учрашувдагина дуранг натижа қайд этилди – «Қизилқум» – «Бухоро» – 2:2. Қизиқ томони, меҳмонлар учрашувнинг сўнгги сонияларида, бунинг устига пенальтидан ҳисобни тенглаштиришга эришдилар.

Олий лига. 12-тур

3 август, сешанба

ЛОКОМОТИВ-W – НАВБАҲОР-W – 1:0 (0:0)

Тошкент. ТТЙМИ стадиони.

Гол: Дилдора Эргашева (79-пен.)

ПАХТАКОР-W – БУНЁДКОР-W – 1:5 (1:1)

Тошкент в. «Қибрай» стадиони.

Голлар: Зумрад Назарова (37) – Саида Галимова (13), Людмила Карачик (51, 63), Дилдора Нозимова (75, 90)

АГМК-W – МEТАЛЛУРГ-W – 2:0 (0:0)

Олмалиқ. «Металлург» стадиони.

Голлар: Комила Зарипова (81), Лейла Рустуллаева (90+4)

СЎҒДИЁНА-W – СEВИНЧ – 2:0 (1:0)

Зомин. «Зомин» стадиони.

Голлар: Диёра Хабибуллаева (34), Махлиё Сариқова (90+3)

ҚИЗИЛҚУМ-W – БУХОРО-W – 2:2 (0:1)

Навоий. «Ёшлик» стадиони.

Голлар: Шахзода Жамолова (47), Дилафруз Тошпўлатова (88) – Зебинисо Ғаниева (26), Шахноза Юсупова (90+5-пен.)

12-турдан кейин «Сўғдиёна» 34 очко билан турнир жадвалида пешқадамлик қиляпти. «Бунёдкор» 32 очко билан, «Севинч» эса 25 очко билан учинчи ўринда боряпти. АГМКда 19, «Металлург»да 16, «Навбаҳор»да 13, «Локомотив»да 11, «Пахтакор»да 8, «Бухоро»да 7 очко бор. Турнир аутсайдери «Қизилқум» 5 очко билан сўнгги ўринни «банд» этиб турибди.

Навбатдаги учрашувлар 9 августга белгиланган. Саккизта жамоа Ўзбекистон Кубогининг чорак финал ўйинларида майдонга тушади. Булар:

«Пахтакор-W» – «Металлург-W»

«Сўғдиёна-W» – «Севинч»

«АГМК-W» – «Бунёдкор-W»

«Навбаҳор-W» – «Локомотив-W».