АҚШ сайланган Президенти Дональд Трамп раҳбарлигининг биринчи кунида амалга оширмоқчи бўлган ваъдалар орасида энг кўп Россия - Украина можарони ҳал қилиш, иккинчи ўринда чегараларни ёпиш тилга олинган, деб ёзди "Ахиос" портали.

Дарвоқе, Трамп Украинадаги можарони музокара йўли билан, ҳатто бир кунда ҳал қила олишини бир неча бор таъкидлаган.

РФ эса ушбу баёнотга изоҳ бериб, бу бир кунда ҳал қилиб бўлмайдиган жуда мураккаб муаммолигини таъкидлаган.

Нашр Трампнинг 2023 йил 1 январдан 2024 йил 6 декабргача бўлган даврдаги 122 баёноти, матбуот анжумани ва интервьюсини таҳлил қилди. Маълум бўлишича, бўлажак раҳбар Украина мавзусида 33 марта чиқиш қилган. Кейин АҚШ чегараларини ёпиш режаси (32 эслатма) ва ноқонуний муҳожирларни оммавий депортация қилиш (25 марта) масалалари энг кўп тилга олинган.

Энди эса мазкур мураккаб масалалар бўйича баёнот аввалгидек кўп янграмаяпти. Трамп сўнгги пайт масала мураккаблигини тан олиб, лавозимга киришганидан сўнг 24 соат ичида Украина можаросини ҳал қилиш ҳақидаги аввалги баёнотини эслашга унча иштиёқ билдирмай қўйган. Бу ҳолат, табиийки, унинг сиёсий нуфузига соя ташлаши мумкин.