Автомобиль саноати ҳамон пандемиядан аввалги ҳолатига қайта олмаяпти.

Компонентлар етказиб берилишидаги узилишлар, айниқса, яримўтказгичлар тақчиллиги, қолаверса, Хитойда COVID-19 инфекцияси тарқалиши яна авж олгани сабабли жорий қилинган чекловлар ҳали ҳам дунё автомобиль саноати юксалишига тўсқинлик қилмоқда ва соҳада талабни қондира олмаяпти. Масалан, Европада янги автомобиллар савдоси июнь ойи натижаларига кўра, тахминан 1,1 миллион донани ташкил этди. Бу аввалги йил июнь ойи билан таққослаганда 16,8 фоизга камдир.

Европа автомобилсозлари ассоциацияси (ACEA) маълумотларига кўра, мана 11 ойдирки, соҳада салбий динамика кузатилмоқда. Қолаверса, мазкур ҳолат мавжуд муаммолардан ташқари, Украина билан боғлиқ логистик узилишлар сабабли янада мураккаблашган.

«Казинформ» халқаро ахборот агентлигининг Energyprom.kz сайтига таяниб ёзишича, жорий йилда янги автомобиллар савдосида Европа мамлакатлари орасида Германия етакчилик қилган, яъни мамлакатда июнь ойида 224,6 мингта автомобиль сотилган. Бу ўтган йилнинг шу даврига нисбатан 18,1 фоизга камдир. Кейинги ўринда 171,1 мингта машина билан Франция бормоқда. Бироқ Францияда ҳам кўрсаткич аввалги йилнинг шу даврига нисбатан 14,2 фоиз кам. Кучли учликдан Буюк Британия ҳам жой олди. Бу мамлакатда бу йил 141 мингта автомобиль сотилган бўлиб минус 24,3 фоизни, яъни 1996 йилдан буён энг паст кўрсаткични қайд этмоқда.

Энг ачинарли аҳвол Россия ва Беларусь автомобиль саноатида кузатилмоқда. Масалан Россияда бу йил автомобиль савдоси бир йўла 82 фоизга тушиб кетди. 2022 йилнинг июнь ойида Россияда атиги 27,8 мингта авто сотилган. Беларусда ҳам аҳвол чатоқ, яъни 68 фоизга қисқарган. Мамлакатда июнь ойида атиги 1,1 мингта машина сотилгани айтилмоқда.

Умуман, Европада сотилган янги автомобиллар сони жорий йилнинг биринчи ярмида 5,6 миллион донани ташкил этди ва соҳада аввалги йилнинг шу даврига нисбатан 17,7 фоизлик пасайиш қайд этилди. Россияда ярим йилда автомобиль савдоси 57 фоизга тушиб кетди ва 370,2 мингтани ташкил этган. Беларусда эса ўтган олти ойда янги автомобиллар савдоси 47,2 фоизга тушиб, жами 11,9 минг донани ташкил этди.

Қўшни Қозоғистонда эса автомобилслозлик билан боғлиқ вазият анчайин яхши экани айтилади. Масалан, июнь ойида янги автомобиллар савдоси 11,9 минг донани ташкил этган. Бу 2021 йилнинг июнь ойи билан солиштирганда атиги 1,1 фоизга кам дигани. Яна бир эътиборли жиҳати, Қозоғистонда сотилган жами автомобилларнинг 83,5 фоизи мамлакатда ишлаб чиқарилган машиналар. Умуман, жорий йилнинг январь-июнь ойларида мамлакатда 51,9 мингта янги автомобиль сотилган. Бу йилги олти ойда ўтган йилнинг шу даври билан таққослаганда 8 фоиз кам машина сотилган.

Қозоғистонда жами сотилган автомашиналарнинг ярми учта мегаполисга – Олма-ота (3 минг), Нур-Султон (2,5 минг) ва Шимкент (1,4 минг) шаҳарларига тўғри келмоқда. Шунингдек, Қарағанда ва Костанайда ҳам анчагина кўп автомобиль сотилган.

Қозоғистонда энг оммабоп машина моделлари ҳамон Chevrolet Cobalt (2,5 минг дона), Chevrolet Nexia (1,2 минг дона) ва Hyundai Tucson (727 минг дона) бўлиб турибди. Энг оммабоп автомобиллар ўнталигига Hyundaiнинг бир йўла тўртта модели (Tucson, Elantra, Sonata ва Santa Fe) кирди. Бундан ташқари, энг оммабоп машиналарга Chevroletнинг иккита модели (Cobalt ва Nexia) ҳамда Kia (Sportage ва Soul) киритилди, шунингдек, Lada (Granta) ва Toyota (Land Cruiser Prado) ҳам ўнталикка кира олган.