28-sentyabr kuniga qadar davom etadigan avtomarafon poytaxt Toshkent shahrida boshlanib, Zomin, Samarqand, Shahrisabz, Boysun, Denov, Termiz, Buxoro, Xiva, Nukus, Moʻynoq shaharlaridan oʻtadi va Orol dengiziga borib tugallanadi.

Avtomarafon ishtirokchilari yoʻlda Zominning shifobaxsh archa oʻrmonlari, qoyadan qirq kokil singari otilib chiqayotgan Sangardak sharsharasi, togʻ dovonlari va serpantinlari, Boysun daralari, Xoʻja Gur-Gur ota massivining ulugʻvor devorlari, ming yillik Sayrob chinori, betakror Jarqoʻrgʻon minorasi, Shahrisabz, Samarqand, Buxoro va Xivadagi YUNESKO Jahon madaniy merosi javohirlari, Nukusdagi noyob Saviskiy muzeyi, “Borsa kelmas” ulkan qorday oq shoʻrxogʻi, Qizilqum qumlari, Xorazm va Qoraqalpogʻistonning qadimiy qalʼalari, Moʻynoqdagi kema qabristoni va boshqalarni koʻrishlari mumkin boʻladi.

Shuningdek, ular Sudochye koʻli boʻyidagi qushlarni tomosha qilishadi, qadimiy koʻchmanchilar kabi haqiqiy oʻtovda yashashadi, Orol dengizida sehrli quyosh botishidan zavq olishadi, Oʻzbekistonning turli mintaqalari folklorlari bilan tanishadi. Butun sayohat kvest shaklida amalga oshiriladi va ishtirokchilar bir nuqtadan boshqasiga oʻtib zerikishlariga aslo imkon boʻlmaydi. Ushbu 4600 kilometrlik haqiqiy epik avtomarafonda sayyohlar va sarguzashtsevarlar, tarix va madaniyat ixlosmandlari ishtirok etishi mumkin. Oʻz transport vositalariga ega boʻlmagan kishilar avtomobilni haydovchisi bilan yoki haydovchisiz ijaraga olishi mumkin.

Bundan tashqari, siz yoʻlning istalgan joyida marafonga qoʻshilishingiz mumkin. Avtomarafon “Advantour” va “Asia Adventures” sayyohlik kompaniyalari tomonidan Turizmni rivojlantirish davlat qoʻmitasi qoʻllab-quvvatlashi ostida oʻtkaziladi. Loyiha haqida batafsil maʼlumotni https://www.eurasiaexpeditions.com veb-saytidan olishingiz mumkin.