Қуйи Австрия федерал штатига қарашли Трайскирхен шаҳрида уюштирилган қуролли ҳужум натижасида бир киши ҳалок бўлди, бир одам оғир яраланди.

ORF жамоат телеканали хабарига кўра, воқеа шаҳар марказида содир бўлган. Полиция ҳужумчи узун найли қуролдан ўқ узиб, икки кишини яралагани ҳақида маълум қилди.

Жабрланганлардан бири воқеа жойида вафот этган, иккинчи оғир ярадор вертолётда Венадаги касалхонага олиб кетилган.

Ҳуқуқ-тартибот идоралари хулосасида жиноятчи Австрия фуқароси экани, қилмишидан сўнг ўз жонига қасд қилгани келтирилган. Қайд этилишича, у қамоқдан вақтинча озод қилинаётган эди.

Полиция ҳужумда қўлланган қурол расман рўйхатдан ўтмаганини қўшимча қилган. Жиноят сабаби ўрганиляпти.

М.Пирматова, ЎзА