Avstraliyaning sharqiy qirg‘og‘ida sodir bo‘lgan yirik suv toshqinlari qurbonlari soni 10 nafarga yetdi, bir necha kishi bedarak yo‘qolgan, deb xabar beradi “TASS”.

Bugun Kanberrada bo‘lib o‘tgan matbuot anjumanida Avstraliya bosh vaziri Skott Morrison hukumat tabiiy ofat tufayli uylaridan ayrilganlarga yordam berish uchun 3 million avstraliya dollaridan (2,2 million dollar) ko‘proq yordam berilayotganini e’lon qildi.

— Kvinslend va Yangi Janubiy Uelsdagi suv toshqinidan jabr ko‘rgan 26 ta hudud aholisi 1 martdan boshlab Hamdo‘stlik mamlakatlari hukumatiga moliyaviy yordam so‘rab murojaat qilishi mumkin, — dedi Morrison. Ular kattalar uchun 1000 va bolalar uchun 400 avstraliya dollari miqdorida yordam puli olishi mumkin.

Yangi Janubiy Uels bosh vaziri Dominik Perrotning aytishicha, mintaqaning qutqaruv xizmati so‘nggi 24 soat ichida 6000 dan ortiq qo‘ng‘iroqlarni qabul qilib, 1000 ga yaqin odamga yordam ko‘rsatgan.

— Mintaqada 40 ming kishini zudlik bilan evakuatsiya qilish to‘g‘risida buyruq berildi, — dedi Dominik Perrot. Shuningdek, u shtatda suv toshqini bilan bog‘liq birinchi o‘lim holati dushanba kuni kechqurun qayd etilganini, shundan so‘ng mamlakatda suv toshqini va uning qurbonlari umumiy soni 10 kishiga yetganini ta’kidladi.

Avstraliyaning shimoli-sharqiy va sharqiy qirg‘og‘ida uzoq davom etgan yomg‘ir tufayli keng ko‘lamli suv toshqinlari boshlandi. bugungi kunga qadar 60 mingga yaqin odamni evakuatsiya qilish to‘g‘risida buyruq berilgan.

Kvinslend janubi-sharqidagi bir qancha aholi punktlari to‘liq evakuatsiya qilindi, mintaqaviy magistrallarning bir qismi  vayron bo‘lgan.